Standard variabel pris gunstig i fjerde kvartal

Produktet spotpris med påslag var i Sør – Noreg over kvartalet 9, 5 øre/kWh dyrare enn prisen for dei 15 billigaste leverandørane som tilbyr standard variabel kontrakt.

Prisendringar på ein standard variabel kontrakt må varslast to veker på førehand medan spotprisen kan svinge fritt. – Det er difor ikkje unaturleg at prisen på ein standard variabel kontrakt kan vere billegare enn spotpriskontrakten når kraftprisane stig, og dyrare i ein periode når kraftprisen fell, seier seksjonssjef Gunn Oland. Ulempa med standard variabel pris er at prisen kan endra seg utan nokon særskild grunn frå kraftleverandørane. Andre kontraktar føljer på førehand avtalte prisoppsett eller prisbaner og er dermed lettare å halde oppsyn med for kunden.

NVE sin leverandørskifterapport viser at vi må tilbake til fyrste kvartal 2006 siste gong spotprisen i snitt låg over prisen for standard variabel kontrakt. Mot slutten av 4. kvartal hadde prisen på ein standard variabel kontrakt teke igjen spotprisen og var i dei to siste vekene dyrare i snitt. Samanlikna med same kvartal i 2006 var både kontraktformene billegare i 2007.

Fleire skifta kraftleverandør
Fleire skifta kraftleverandør i 4. kvartal enn i 3. kvartal 2007.  Det er likevel færre enn same kvartal i fjor, då heile 70 900 hushaldskundar skifta kraftleverandør. Blant hushaldskundane skifta 46 750 kraftleverandør dette kvartalet, mot berre 35 800 kvartalet i førevegen. Blant næringskundar var det og ein svak auke i talet på skifte dette kvartalet. Færre hushaldskundar vel å ha standard variabel kontrakt og fleire går over til spotpriskontrakt også dette kvartalet. Ved utgangen av 2007 hadde 39,9 prosent kontrakt knytt til elspotprisen medan 49,7 prosent hadde standard variabel kontrakt. På same tidspunkt i fjor var tala høvesvis 33,6 prosent og 54,6 prosent.

Les heile rapporten på www.nve.no

For meir informasjon kontakt
Seksjonssjef Gunn Oland, tlf. 22 95 92 22, mobil 902 21 248
Rådgjevar Hege Bøhler, tlf. 22 95 94 15