– Toppleiarar i idretten er avhengig av eit "bakkemannskap" heime

Hanne Sogn er stipendiat ved institutt for idrett og samfunnsvitskap og har gått djupt inn i norsk idrett dei siste åra. 

Sjølv har ho tidlegare vore generalsekretær i Norges basketballforbund og Norges klatreforbund. I den rolla var ho eitt av få unnatak i norsk idrett. 

Må slutte å fikse på kvinnene

85 prosent av dei valde toppleiarane i norsk idrett er nemleg menn. 

Norsk idrett jobbar hardt for likestilling, men likevel har det ikkje blitt fleire kvinner med makt i toppen. 

Etter å ha intervjua og fylgd nærmare 40 både nåverande og tidlegare leiarar, fann Sogn den svært hektiske kvardagen som ein viktig grunn.

– Kvardagen til ein toppleiar i idretten er ekstremt hektisk. Dei må vere tilgjengeleg 24/7. Den er ofte kriseorientert og uforutsigbar. Telefonar kjem nærmast heile døgnet. Dei er mykje ute og reiser, og skal heile vegen ha møter med NIF, krinsar og andre særforbund, seier Sogn og oppsummerer:

– Ein optimal toppleiar har få forpliktingar heime.

Ho meiner også at dei mange tiltaka norsk idrett har gjort for å løfte kvinnene, ikkje har funka. 

– Mitt bodskap er at ein må slutte å fikse på kvinnene. Fiks heller på systemet!

Sogn har hatt tett dialog med idretten gjennom prosjektfasen og har nå klare anbefalingar som idretten kan ta vidare. 

2.februar disputerer ho ved Norges idrettshøgskole. Disputasen er open for publikum og er spesielt relevant for alle i og rundt Norges idrettsforbund.