Undersøkinga viser at seks av ti barn flyttar minst ein gong etter at dei kom til barnevernsinstitusjonar. Tolv prosent har flytta fire eller fleire gonger.

I desember 2019 budde 774 barn i barnevernsinstitusjonar. – At behova til fleire av disse barna ikkje blir godt nok kartlagde, kan gje alvorlege konsekvensar for det vidare livet til barna det gjeld, seier riksrevisor Per-Kristian Foss.

Barnevernet skal leggje avgjerande vekt på kva som er til det beste for barnet når dei vel tiltak. Barne-, ungdoms- og familieetaten (Bufetat) har plikt til å tilby det kommunale barnevernet ein plass i ein barnevernsinstitusjon som er tilpassa det enkelte barns behov. Undersøkinga viser at Bufetat ikkje sikrar det beste for barnet ved alle plasseringar i barnevernsinstitusjonar.

Ikkje tilstrekkeleg oppfølging frå Bufetat

Institusjonsopphaldet skal bidra til å gi barn trygge rammer, utviklingsmoglegheiter, auka livskvalitet og varige, positive endringar i livet. Undersøkinga viser at oppfølginga frå Bufetat ikkje er tilstrekkeleg for å sikre utviklinga og framtida til alle barn som er på barnevernsinstitusjonar.

– Det er alvorleg at oppfølginga frå Bufetat ikkje er tilstrekkeleg for å sikre utviklinga og framtida til alle barn som er på barnevernsinstitusjonar. Manglande dokumentasjon av plasseringar i institusjonar svekkjer rettstryggleiken til barna, seier Foss.

For fleire barn manglar planar for utvikling og mål med plasseringa. Undersøkinga viser til dømes at det er lite dokumentasjon og rapportering om utviklinga til det enkelte barnet, og heller ikkje korleis barnet har medverka. Institusjonane rapporterer sjeldan om kva behandling barn eventuelt får, og korleis det blir lagt til rette for at barn skal ta imot psykisk helsehjelp.

Dokumentasjon er viktig for å velje rett tiltak for barnet også for framtida. Manglande rapportering om barnet gjer det til dømes vanskeleg å vurdere utviklinga til barnet og eventuelt setje i verk nødvendige korrigerande tiltak. I mange tilfelle blir resultatet av plasseringa ikkje evaluert.

Les meir om undersøkinga på riksrevisjonen.no