Stengjer E134 Håradalen i samband med bilberging

Det var måndag kveld at ein semitrailer køyrde av vegen i ein av svingane i Håradalen sør for Røldalstunnelen, og vart liggjande 15 meter nedfor vegbanen.

Bilberginga startar i kveld, tysdag, klokka 22.00. 

– Det er ein stor jobb å få bilen opp på vegen att. Det krevst stor oppstillingsplass til bergingsbil, og for å få gjort bilberginga på ein forsvarleg måte må E134 Håradalen difor stengjast heilt natt til både onsdag og torsdag. Vi vel å stengja vegen på den tida av døgnet det er minst trafikk, seier byggjeleiar Gaute Sekse i Statens vegvesen.

VTS Vest (Vegtrafikksentralen) opplyser at omkøyring austfrå blir via riksveg 13, mens vestfrå må du fylgja E134 mot Ølen.

Noko opning blir det likevel gjennom Håradalen dei to nettene bilberginga pågår: 

Klokka 23.00 - 23.30, 01.00 - 01.30, 03.00 - 03.30 før det vert jobba uavbrote frå 03:30 - 06:00 då det er minimalt med trafikk på strekninga som gjennomsnittleg vert trafikkert av 2200 køyretøy. 15 prosent, eller 330 av desse, er lange køyretøy.