Stáhta geaidnodoaimmahat bidjá ođđa birasgáibádusaid muohtačorgemii Oarje-Finnmárkkus

Oktiibuot 546 kilomehteriin lea dát okta dain stuorámus riikageaidnošiehtadusain Norggas. Gaskkat nugo E69 Davvenjárgii ja E6 Áisaroaivvi badjel leat maid gaskkat riikkas gos lea eanemus dálki.

Buorebut muohtačorgenprofiillat

Stáhta geaidnodoaimmahat áigu váikkuhit ruoná molsumii go movttiidahttá unnit CO2-luoitimii.

– Stuorámus dálkkádatvuoittu oažžu go geahpida vuddjon kilomehteriid logu ja diibmobarggu losit dávviriin. Mii oaivvildit dan vejolažžan nu ahte ii čuoza geaidnofierpmádaga doaimmaheami standárdii, dadjá Stáhta geaidnodoaimmahaga juogushoavda Torvald Tretteskog.

Plána lea geavahišgoahtit mašiinnaid mat sáhttet sirdit muohtaravddaid vai oažžu buoret profiilla mii hehtte guolddu bisáneames geainnu ala. Dasto sáhttá unnidit muohtačorgema kilomehterlogu. Seammás buorrána johtolatmannu duottarrasttildemiin, šaddet unnibut ráidovuodjimat ja giddejuvvon geainnut.

Bálkkaša muohtadeponiija

Stáhta geaidnodoaimmahat áigu maid bálkkašit entreprenevrraid geain leat buorit čovdosat muohtadeponiijii Hámmerfeasttas, ovdamearkka dihte kontainerat muohttaga suddadeapmái. Ulbmil dainna lea hálddašit suddančázi ja vejolaččat sirret eret nuoskkideami.

Ođđa šiehtadus maid bidjá gáibádusa ahte guorbmebiillain ja mašiinnain galget unnit luoitimat go gáibiduvvo ahte mutuvrrain galgá leat ođđaseamos teknologiija. Entreprenevra oažžu liigemávssu geavahit vuodjinfievrruid ja mašiinnaid liigebargguid ovddas. Leat maiddái biddjon gáržžádusat biilla leat guorosmannamis jođus.

Buot fitnodagat mat háliidit bargguid Stáhta geaidnodoaimmahagas fertejit leat birasdohkkehuvvon, ja buohkat fertejit raporteret CO-2 luoitimiid birra. Mihttu lea ahte Geaidnodoaimmahaga doaimmaid luoitimat galget beliin unnot jagi 2030 rádjái.

Stuora ja guhkes šiehtadus

Ođđa šiehtadus boahtá fápmui čakčamánu 1.b., ja šiehtadus gusto viđa jahkái, gitta 2026 čavčča rádjái. Jus soahpamušbealit leat ovtta oaivilis, de lea vejolaš guhkit šiehtadusa gitta golmmain jagiin. Dasa lassin lea Stáhta geaidnodoaimmahagas vejolašvuohta maŋŋel dan, guhkidit vel ovttain jagiin, nu ahte šiehtadusa guhkkodat sáhttá šaddat gitta ovcci jagi.

Šiehtadus siskkilda E6, E69, riikageainnu 92 ja riikageainnu 94 Porsáŋggu, Davvenjárgga, Guovdageainnu, Kárášjoga, Hámmerfeastta ja Álttá suohkaniin. Ollislaš 546 kilomehteris, dahket vázzin- ja sihkkelastingeainnut 14 kilomehtera.

Áigemearri buktit fálaldaga lea cuoŋománu 15.b.