Så lett som ingenting med Odd Nordstoga

Den tredje låten frå Nordstogas nye prosjekt er ute på straumetenestane fredag 3. juni. Det er ikkje nødvendigvis ein slik låt som ser deg djupt i augo og seier «I love you!» Nei, heller berre ein slik som prisar kor det lyfter, kor fint og kor lettvint detta livet kan vera, berre den andre er i nærleiken. 

Som eit snøflak i desember

som kjem dalande og smeltar på di hand

Og som linerla om våren

som så liketil velsignar dette land

Som eit vindblaff i gardina

som seier: «Hei! Her er det liv i alle ting»

Ja, som morgonen som lyser inn er det

og det lyfter denne dagen

så lett som ingenting

Slik kan det ver’ når du er ikring

Så lett som ingenting

 

Til vanleg så går ein vel ikkje rundt og tenker så mykje på kor mykje glede det gjev berre det at ein har kvarandre. Men sommtid kan ein ta seg i det. Sjå nett den tingen. For ofte er det vel slik at det som gjorde dagen din var dei du dela den med. 

Igjen er låten spelt inn heime i Nordstoga på Nordstrand. Reisverket er sett opp av Odd Nordstoga sjølv, som blei såpass oppstemt av låta sjølv at det på vokalsporet dukka opp både ein og to «juhuar». Etterkvart har det kome musikarar til etter tur og fullendt produksjonen. David Wallumrød drog igjennom ein kveld på pianoet nede i stoga. Håkon Aase kom med fela si ein sundag. Alexander Pettersen hadde ein ledig dag i Oslo, og kom med ein mandolin under armen. Trommene til Torstein Lofthus og bassen til Tor Egil Kreken vart spelt inn rett etter påske med Markus Arnet som kyndig teknikar. Så for låten til miksing hjå Øystein Frantzvåg og vidare til mastering hjå Morgan Nicolaysen.