Riddu Riđđu almmuha Open call filbmadahkkiide

Dán prográmmii sáhttá sáddet filmmaid iešguđet šáŋŋeris, muhto dat eai oaččo leat guhkit go 30 minuhta. Riddu Riđđu ohcala filmmaid main eamiálbmogat ieža čájehit iežaset muitalusaid. Mis lea beroštupmi filmmaide main eamiálbmogiidda gulle leat sihke kámera ovddabealde ja maŋábealde, ja mielas vel eamiálbmoga iežas gillii. Filbma galgá leat tekstejuvvon eŋgelasgillii (filmmaid, main ii leat teaksta, sáhttá gal sáddet sisa, muhto dain galgá leat teaksta dalle go čájehuvvojit festiválas). Riddu Riđđu máksá čájehanbuhtadusa daid filmmaide mat válljejuvvojit filbmaprográmmii.  

Festiválajođiheaddji Sajje Solbakk lea gealddus das makkár responssa sii ožžot:

- Riddu Riđđu lea leamaš ja lea ainge áidnageardásaš arena sámi dáidagii ja kultuvrii. Min Open call-ortnet lea addán fantásttalaš filbmaprošeavttaid, mat leat movttiidahttán sihke min ja gehččiid. Sámis leat ollut taleanttat, ja maid hutkan- ja háhkanmiella. Danin mii sávvatge ahte min e-boastaboksa dieviha ohcamušain mat reflekterejit dan.

Open call-ohcanáigemearri lea cuoŋománu 3. beaivve 2023. Berošteaddji ohccit sáhttetge gávdnat eanet dieđuid dán ortnega birra min neahttasiidduin www.riddu.no.