Personar frå Vestfold og Telemark meldte ifrå om 79 millionar i skjulte verdiar

Gjennom ordninga med frivillig retting kan du i ettertid melde frå om formue og inntekt som du ikkje har oppgjeve til Skatteetaten. Dei som får godkjent frivillig retting må betale skatten dei skuldar pluss renter, men slepp straff i form av tilleggsskatt og mogleg politimelding.

I løpet av 2020 vart det ferdigbehandla 304 saker som resulterte i ei auke av skattbare inntekter på 164 millionar kroner og formuar på 4,1 milliardar kroner. I 2020 kom det inn 212 nye saker. I Vestfold og Telemark resulterte 31 ferdigbehandla saker i ei auke i skattbare inntekter på 1,6 millionar kroner og formuar på 33 millionar kroner.

­– Størstedelen av sakene handlar om økonomiske forhold i utlandet. At vi får meir informasjon frå andre land gjer det vanskelegare å skjule verdiar i utlandet, seier divisjonsdirektør i Skatteetaten, Marta Johanne Gjengedal.

For å få godkjent frivillig retting må du gje opplysingar til Skatteetaten på eige initiativ med ei fullstendig oversikt over alle verdiar du eig. Du kankkje melde frå etter at kontrolltiltak er sett i verk eller varsla om.

Skal førast i skattemeldinga
Over tid har det vore ei endring i kven som ber om frivillig retting. Tidlegare har mange gjort det på grunn av risikoen for å bli oppdaga, at ein har eit ønskje om å ta verdiane tilbake til Noreg, eller fordi ein ønskjer å gjere opp for seg slik at arvingane skal sleppe å ta seg av problemet.

– No ser vi at det varierer meir kven som ber om frivillig retting. Det kan vere kven som helst, men vi ser at det i større grad handlar om at mange ikkje kjenner til regelverket og melder frå når dei oppdagar at verdiane ikkje berre er skattepliktige i det landet ein har eigedom eller konto, seier Gjengedal.

Alle inntekter og formuar, som til dømes bankinnskot, eigedom og aksjeutbyte i andre land, skal opplysast om i skattemeldinga kvart år. Det betyr ikkje at du risikerer å bli skattlagd dobbelt opp.

– Du har plikt til å opplyse om alle inntekter og formuar du har i alle land. Har du blitt skattlagd i utlandet, vil norsk skattelov og skatteavtalar med andre land sørgje for at du ikkje betalar skatten dobbelt opp, seier Gjengedal.

Større sjanse for at inntekter og formuar vert oppdaga
Sidan 2007 har nesten 4000 personar kontakta Skatteetaten for å ordne opp i skjulte økonomiske forhold. Totalsummen på innmelde summar i samband med frivillig retting er no på over 80 milliardar kroner i formue og cirka tre milliardar i inntekt.

– At vi i 2017 innførde automatisk utveksling av opplysingar mellom skattemyndigheiter i fleire ulike land, og stor mediemerksemd rundt lekkasjar som Panama Papers, førte nok til at ekstra mange rapporterte inn saker i 2017 og 2018, seier Gjengedal.

Les meir om frivillig retting på Skatteetaten sine nettsider

År	Tal på nye saker	Tal på ferdig-behandla saker	Sum fastsett formue (akkumulert på endringar inntil 10 år)*	Sum fastsett inntekt (akkumulert på endringar inntil 10 år)*
2020	212	304	4,1 milliardar	164 millionar
2019	394	309	2,4 milliardar	71 millionar
2018	591	875	6,1 milliardar	268 millionar
2017	924	677	8,7 milliardar	279 millionar
2016	515	428	13,7 milliardar	362 millionar
2015	384	254	7,8 milliardar	189 millionar
2014	295	226	6,5 milliardar	281 millionar
2013	229	203	7,9 milliardar	273 millionar
2012	115	125	7,2 milliardar	478 millionar
2011	131	306	9,6 milliardar	544 millionar
2007 -2010		236	11,6 milliardar	288 millionar

* Dette er akkumulerte tal for opptil 10 år. Dersom du har hatt 1 million kroner på konto i mange år, vert det rekna skatt av formuen i opptil 10 år tilbake, så vedtaket kan bli at det vert rekna skatt av ein formue på 10 millionar kroner. Det vert rekna renter på skatten som skulle ha vore betalt, men du får ikkje tilleggsskatt.

 Fylkesfordeling 2020:

Fylke	Tal på ferdigbehandla saker	Sum fastsatt formue (akkumulert på endringar inntil 10 år)*	Sum fastsatt inntekt (akkumulert på endringar inntil 10 år)*
Agder	15	73 millionar	4,9 millionar
Innlandet	10	24,5 millionar	690.000
Møre og Romsdal	12	59,9 millionar	435.000
Nordland	13	5 millionar	41.000
Oslo	84	346 millionar	24,4 millionar
Rogaland	24	76,7 millionar	4,7 millionar
Troms og Finnmark	Under 10 saker
Trøndelag	21	53,8 millionar	766.000
Vestfold og Telemark	31	32,9 millionar	1,6 millionar
Vestland	18	70,9 millionar	8 millionar
Viken	73	3,4 milliardar	119 millionar