Oarjeafrihkálaš ritmmat dán jagi Riddu Riđđus

Máilmminásti Angelique Kidjo vuittii Grammy maŋemus álbumiinnis “Mother Nature” ja geasset čuojaha son Riddu Riđđus. Riddu-álbmot oažžu illudit dánsunoalgguheaddji seaguhussii oarjeafrihkálaš musihkkaárbevieruin, R&B:s, funkas, jazzas ja latiidnaamerihkálaš ritmmain. Gehččiidjiellat The Halluci Nation, mii boahtá Kanadas ja geain ovdal lei A Tribe Called Red namman, leat boahtime Riddu Riđđui. Guossit besset maiddái vásihit Sámi Grand Prix-oasseváldiid SOÁ ja afrocolombialaš Lido Pimienta.

Dán jagi prográmma lea viiddis ja girjái, fatná dáhkunkurssa rájes gitta klubbemii lávuin joavkkuiguin Article 3 ja DJ iDJa & Dj Ailo. Dán jagi davviálbmot lea Kalaallit Nunaata inuihtat. Sis leat gávdnamis sierra lávus Riddu Siiddas ja guossit besset oahpásnuvvat singuin ollu osiin prográmmas.

Festiválajođiheaddji Sandra Márjá West lea rámis festiválaprográmmain: “Lea hui buorre beassat ráhkadit Riddu Riđđu nugo láve leat, gussiiguin mat bohtet sihke guhkkin ja lahka. Mun illudan gullat váriid dávisteame luđiide ja čottalávlagiidda, ja campas oaidnit dolaid ija miehtá.”

Vuoigatvuohta eatnamiidda

Vuoigatvuohta eatnamiidda lea fáddá mii vuhtto miehtá dán jagi festiválas. Dáiddačájáhus Binnáš vel! guovdilastá sisabahkkemiid eamiálbmoteatnamiidda, ja čohkke dáiddáriid Kalaallit Nunaatas ja Sámis. Ovttas Redd Repparfjord-nammasaš aktivistaovttastusain sirdojuvvo miellaláhki Markoppsynetis Riddu-guolbanii. Dás bovdejuvvo festiválaálbmot gáfestallamii, ságastallamii ja viđjehárjehallamii.

Ođđaráhkadeapmi

Sámi dánsejeaddji guovttos Biret Haarla ja Gáddjá Haarla doalaiga čájálmasa Sámi paviljongas Veneziabiennalas, ja geasset beasat oaidnit sudno Riddu Riđđus. Oassin Riddu Sessionsis vuosiheaba ođđa dánsunčájálmasa man namma lea ______. Dán jagi nuorra dáiddár lea mearrasámi duojár Márjá Karlsen, gii háliida bovdet gussiid suinna ovttas gággása duhppet ja juogadit fearániid.

Mustafa x Elle Maija lea áibbas varas ovttasbargu gaskal sápmelačča Elle Máijá Kleftsad Bær ja Mustafa Hasan. Ovddit lea gitáračuojaheaddji ja juoigi ja lea bargan Mari Boiniin, Rolffain ja Bitches Brewiin. Maŋit lea rapper gii lea gulustuvvon garrasit čuohcci teavsttaidisguin ja su guhkes dáistaleamis beassat bissut Norggas.

Máhttu

Riddu Riđđu guovdilastá áigeguovdilis eamiálbmotfáttáid semináraprográmmain mii lea viiddis: aktivismma rájes sámi oahpaheaddjeváni rádjái. Oanehisfilbmaprográmma Eamifilbma ovdandivvu áigeguovdilis eamiálbmotfilmmaid, mat erenoamážit čalmmustahttet Sámi ja Kalaallit Nunaata. Riddu Riđđu gussiide fállat maiddái dán jagi gelddolaš kurssaid dáhkumis, juoigamis, rumbodánsumis ja siviila jeagohisvuođas. 

Dán jagi festivála lea maŋemus maid festiválajođiheaddji Sandra Márjá West jođiha. Ođđa festiválajođiheaddji, Sajje Solbakk, álgá bargui geassemánu 1.b. ja váldá badjelasas dáiddalaš jođiheami Riddu Riđđu 2022 maŋŋel.

Ollislaš prográmma ja bileahtaid gávnnat dás:www.riddu.no. Dihto prográmmaoasit, nugo Mánáidfestivála, Riddu Nuorat, dáhkunkursa ja juoigankursa gáibidit dieđiheami.