Nattestengde E16-tunnelar mellom Voss og Trengereid

– Me skal leggja sprøytebetong på eksisterande overflate, og sikra fjellet med boltar. Dette er ein del av det jamnlege sikringsarbeidet me gjer for å vareta trafikktryggleiken i tunnelane som er mellom dei mest inspiserte og overvakte elementa på norske riks- og europavegar, seier byggeleiar Åge Johan Fanebust i Statens vegvesen.

Difor må tunnelane stengjast

Alt arbeid vil foregå mellom klokka 21.00 og 06.00 frå måndag kveld til fredag morgon. Desse tidspunkta er vald sidan trafikken er minst på natta.

Prosjektet vil likevel få konsekvensar for trafikantane, sidan tunnelane må stengjast medan jobben pågår.

Dette skuldast at sprøytebetongen treng tid for å herda og tørka.

– Me beklagar ulempa det vil gje for bilistane at tunnelane vert heilt stengde medan arbeidet pågår, men då er det viktig å understreka at me gjer denne jobben nettopp for dei; for at trafikktryggleiken skal kunna varetakast også i framtida. Me tek trafikktryggleiken på største alvor, understrekar Fanebust.

Når skal jobben gjerast?

Arbeidet i tunnelane vert fordelt som fylgjer:

Veke 42: Tunnelane frå og med Trengereid til og med Vaksdal. Det vil seia Trengereid-, Stavenes-, Langhelle-, Kjenes-, Boga- og Jamnatunnelen.

Veke 43: Arbeid i Trollkone-, Hyving-, Nakkagil- og Holemarktunnelen. I denne veka kan personbilar køyra over Hamlagrø om natta.

Veke 44: Hernes- og Væletunnelen samstundes, og på slutten av veka Knoltatunnelen.

Utrykkingskøyretøy kan passera etter avtale med stadsansvarleg.

Planlegg reisa di

Statens vegvesen oppmodar alle om å sjekka 175.no før ein skal ut reisa.

Her finn ein til ei kvar tid oppdatert informasjon om situasjonen på alle norske vegar, slik at trafikantane mellom anna kan planleggja omkøyring når det er naudsynt.