Manne boahtá Riddu Riđđu Festivalii 2023

“Manne” lea gáivuotnalaš komponistta og buvttadeaddji Herman Rundberga soloprošeakta. Herman ollu jagiid bargan iešguđetlágan šáŋŋeriiguin, čuojahanjoavkkuiguin ja prošeavttaiguin. Earret eará lea son dahkan šuoŋaid Norgga Opera & Ballettii ja Nobel Ráfibálkkašupmái, vuoitán Amanda-bálkkašumi Guovdageainnu stuimmit -filmma musihkain ja johtán ollu Violet Road ja Alit Boazu čuojahanjoavkkuiguin.

Vuosttaš čájáhus fámolaš soloprošeavttain

Dál son almmuha vuosttaš geardde iežas musihka prošeavttain «Manne». Su vuosttaš skearru almmuhuvvo boahtte jagi, ja dan vuosttaš ovdanbuktin lea Riddu Riđđu festiválas 2023.

«Riddu Riđus lea leamaš guovddáš oassi mu bajásšaddanáigodagas, ja dat leamaš dehálaš arena munnje komponistan, musihkkáriin ja mearrasápmin. Dovddan ahte šaddá hirbmat stuorisin čađahit vuosttaš čájáhusa Manne-prošeavttain dán festiválas.»

Mearrasámi identitehta lea álohii leamaš lunddolaš oassin Hermana dáiddalaš bargguin. «Manne» prošeavttas son buokčala čiekŋalit iežas duogážii mas ođđa šuoŋat leat ožžon váikkuhusaid árbevirolaš luđiin ja mearrasámi sálmmain ja mat dasto laktojuvvojit oktii ođđaáigásaš musihkalaš eanadahkii. Skearrus leat mielde Arktisk Filharmoni sihke muhtun Sámi ja Davvi-Norgga artisttat ja musihkkárat.

Boahtte jagi Riddu Riđđu festivála lágiduvvo suoidnemánu 12.-16. b. 2023 Olmmáivákkis, Gáivuona suohkanis. Váldo-osiin geavvá festivála olgoáimmus, ja prográmma heive olles bearrašii; omd. mánáidfestivála, nuoraid-camp, dáiddavuosehus, girjjálašvuohta, lávdedáidda, musihkka, filbmaprográmma, seminárat ja kurssat. Festivála-campas sáhttá nuvttá tealttástallat ja lávostallat. Eanet dieđut gávdnojit festivála neahttasiiddus www.riddu.no.