Målsetjinga er å bygge eit nytt sterkt fiberselskap på Vestlandet

– Telekom-sektoren står framfor mange store endringar. I dag har vi fleire store og små fiberselskap på Vestlandet. Vi meiner eit nytt og større selskap kan ta ein sterkare posisjon i vår region og derfor er vi som eigarar einige om å starte fusjonsforhandlingar, seier Kristin Aadland, styreleiar i selskapa Enivest AS og Eviny Breiband AS. Ho understrekar at dei no skal bruke tida framover til å utgreie grunnlaget for ein eventuell fusjon.

Utvikle kompetansemiljøa

Marknaden for telekom-sektoren har endra seg mykje dei siste åra frå utbygging til drift av fiber, nye aktørar, auka konkurranse og mange ulike spørsmål kring regulering.

– Vi har ei klar målsetjinga om å utvikle dei lokale kompetansemiljøa, styrke vår posisjon som marknadsleiar i regionen og vokse som eit sjølvstendig og sterkt fiberselskap, seier Erik Espeset, styreleiar i Tafjord Connect.

Eit nytt fusjonert selskap vil ha kring 50.000 kundar og ein større kapitalbase som gir auka konkurransekraft.

– Vi meiner eit større fiberselskap på Vestlandet vil ha positiv betydning for eksisterande og nye kundar, seier Kristin Aadland.

Ryddig og god prosess

Målsetjinga er å bruke 2022 til å utgreie grunnlaget for ein fusjon. Er grunnlaget til stades vil det nye selskapet kunne vere i drift frå tidleg neste år. Fram til det eventuelt blir vedteke å fusjonere selskapa vil drifta i dei tre selskapa gå som normalt. Kundane vil ikkje bli påvirka av utgreiingsarbeidet.

– Det er viktig for oss å gjennomføre ein ryddig og god prosess med grundig involvering av dei tilsette i dei tre selskapa. Vi som eigarar er opptekne av å bygge eit sterkt selskap for å skape nye verdiar, og det er viktig for oss å skape eit godt grunnlag for vidare vekst i form av nye arbeidsplassar, seier Johannes Rauboti, administrerande direktør i SFE og nestleiar i styret i Enivest. Saman med Kristin Aadland og Erik Espeset utgjere han det nye interimsstyret for det nye selskapet.

Fakta om dei tre selskapa:

Enivest AS har 56 årsverk og kontoradresse i Førde. Eigarar er Eviny (56,11%), SFE (38,75%) Tussa kraft AS (2,16%), Nandor Helgheim (1,73%), Sunnfjord kommune (0,90%), Hyllestad kommune (0,18%), Gloppen kommune (0,17%)

 Tafjord Connect AS har 37 årsverk og kontoradresse i Ålesund. Eigarar er Tafjord Kraft AS(80%) og Nordvest Nett (20%).

 Eviny Breiband har 6 årsverk og kontoradresse Tysnes/Etne. Eigarar er Eviny (100%)