Løyve til Raukforsen kraftverk og avslag til Gjerdalsvatnet kraftverk

Løyve til Raukforsen kraftverk

Utbygginga vil nytte ei fallhøgd på 77 meter og ved normalt tilsig produsere om lag 13,4 GWh, dette svarar til den årlege straumbruken til om lag 670 husstandar. Installert effekt vert 5,0 MW. Kraftproduksjonen vil redusere vassføringa i Gjerdalselva over ei strekning på 800 meter. Det er satt vilkår om at vatnet skal førast i tunnel, sett bort ifrå ei kort strekning inn mot kraftstasjonen med nedgravne røyr. Nedgraving av røyr over heile strekninga ville medført mykje sprenging i fjell, og terrenginngrepa ville etter NVEs vurdering vore omfattande. Det vil bli ein avkjørsel frå Gjerdalsvegen til kraftstasjonen, ein permanent veg på om lag 600 meter. Det er opna for ei best mogeleg miljø- og landskapstilpassing for vegen ved NVEs endelege godkjenning av detaljplanen for utbygginga.

Det er ikkje registerte nokon spesielle miljøverdiar som blir rørd av ei utbygging, men det finnast laks og sjøaure i elva nedstraums kraftstasjonen. Av omsyn til vassdragsmiljøet og opplevinga av dette er det mellom anna fastsete ei minstevassføring på 1500 l/s om sumaren. Om vinteren er det sett vilkår om slipp av 350 l/s forbi kraftverksinntaket.

Ikkje løyve til Gjerdalsvatnet kraftverk

NVE har avslått konsesjonssøknaden frå Nord-Norsk Småkraft AS om bygging av Gjerdalsvatnet kraftverk. Kraftverket var planlagt å nytte eit fall på 76 meter i Stillelva/Gjerdalselva i fossen ned mot Gjerdalsvatnet. Med ein installert effekt på 3,0 MW ville kraftverket produsert om lag 9,3 GWh/år ved normalt tilsig. NVE har lagt avgjerande vekt på at fråføringa av vatn i fossen ned mot Gjerdalsvatnet er negativt for landskapet og opplevinga av dette ved utøving av friluftsliv. NVE meiner det ikkje er mogeleg å redusere ulempene med avbøtande tiltak. Gjerdalen er registrert som eit svært viktig friluftsområde i Sørfold kommune, og området rundt Gjerdalsvatnet er godt tilrettelagt for friluftsliv.

Dei negative konsekvensane ved bygging av Gjerdalsvatnet kraftverk står etter NVE sitt syn ikkje i forhold til auka kraftproduksjon eller andre positive effektar av ei utbygging. NVE vurderar at ei utbygging av vassdraget ikkje er akseptabel i høve til ålmenne interesser og gjev difor ikkje løyve til Gjerdalsvatnet kraftverk.

Kontaktpersonar

Seksjonssjef Øystein Grundt, tlf: 22 95 93 89

Sakshandsamar Asgeir Vagnildhaug, tlf: 22 95 99 37