Fullt kundeutbytte i Sparebanken Vest

– Vi er veldig glade for at vi kan dele av overskotet til banken med kundane våre på denne måten –særleg i den uvissa vi er i no. Vi vil strekke oss langt for at kundane våre skal gå ein trygg, økonomisk framtid i møte, seier Jan Erik Kjerpeseth, konsernsjef i Sparebanken Vest.

Din del av overskotet til banken

Kundeutbytte er kunden sin del av overskotet til Sparebanken Vest. Sjølve summen som blir utbetalt til den enkelte, er basert på:

• Kor mykje du har i lån og innskot
• Resultatet til banken for 2020
• Kor lenge du har vore kunde i 2020

Naturleg å gje tilbake til kundane

Kundeutbytte er heilt i tråd med grunnverdiane til sparebankane, påpeikar Kjerpeseth.

– 60 prosent av Sparebanken Vest er eigd av kundane. Då er det heilt naturleg at også store delar av overskotet, som vi skapar saman med kundane våre, skal kome dei til gode, seier han.

Ytterlegare 100 millionar kroner til lag, frivilligheit og kultur

I tillegg til kundeutbytte, kjem det også ei bevilling på 100 millionar kroner frå Sparebankstiftelsen Sparebanken Vest. Midla har som formål å bidra til gjenoppbygginga av organisasjonane og frivilligheiten på Vestlandet etter ei turbulent tid.

– Mange lag og organisasjonar blør no som følgje av pandemien, og vi, saman med Sparebankstiftelsen, ønsker å bidra til at dei skal komme raskt tilbake til slik det var før pandemien. Vi skal gjere det vi kan for å styrke lokalsamfunn og verdiskaping her i vest, seier Kjerpeseth.

Styret i Sparebanken Vest har også foreslått å løyve 290 millionar kroner til gåver og allmennyttige middel til hausten. Tildelingar frå denne potten er avhengig av den økonomiske utviklinga, utsiktene framover, resultat og kapitalsituasjon for banken.

Korona-fondet rullar vidare

Korona-fondet frå Sparebankstiftelsen, som vart lansert i mars i fjor, har fått ei varm mottaking på Vestlandet. Til no er meir enn 60 millionar kroner delt ut til nærare 1200 frivillige lag, foreiningar og organisasjonar som har økonomiske utfordringar som følgje av korona-situasjonen. Det er framleis nesten 40 millionar kroner att.

– Når eg ser kva dei som har fått støtte frå Korona-fondet har fått til i det året vi har vore igjennom, blir det klart for meg kor verdifullt dette er. Det er svært viktig for oss å levere på samfunnsoppdraget vårt ved å stille opp for dei som har vore råka ekstra hardt av pandemien, og vi håper på enda fleire søknadar til fondet framover, seier Kjerpeseth.

Midla frå fondet kjem vestlendingar i alle aldrar til gode – frå Jæren i sør til Volda i nord. Les om tildelingane her:

• Festivalane i vest får krisestøtte frå Sparebanken Vest
• Støttepasning til idretten på Vestlandet
• Studentane i Bergen får korona-stønad frå Sparebanken Vest
• Ja, vi elskar korpsmusikk!

Les meir om kundeutbytte på spv.no