Arbeidet med å tilsetje ny biskop i Bjørgvin etter Halvor Nordhaug har gått føre seg sidan mai i fjor.

No har dei tolv biskopane i Den norske kyrkja og Bjørgvin bispedømeråd uttalt seg om kven dei meiner bør verte ny biskop.

Slik uttalte biskopane seg

Biskopane gjev kvar si fråsegn med deira vurdering av kven av dei tre kandidatane dei meiner er mest skikka. Fristen for dette var 19. januar. Grunngjevinga er ikkje offentleg – men vil inngå i Kyrkjerådet sitt arbeid med å gjere tilsetjing.

Dette er biskopane si prioritering:

Namn
Ragnhild Jepsen	5 førstestemmer	6 andrestemmer	1 tredjestemme
Kjersti Gautestad Norheim	5 førstestemmer	2 andrestemmer	5 tredjestemmer
Sunniva Gylver	2 førstestemmer	4 andrestemmer	6 tredjestemmer

Dette meiner bispedømerådet i Bjørgvin

Bjørgvin bispedømeråd hadde møte 12. januar og gjorde si rangering av dei tre kandidatane. Bispedømerådet si prioritering er

1. Ragnhild Jepsen
2. Sunniva Gylver
3. Kjersti Gautestad Norheim

Vegen til ny biskop i Bjørgvin

Prosessen med å tilsetje ny biskop er ein langvarig prosess, frå 96 føreslegne kandidatar i september og seks kandidatar i desember. Etter ei rådgjevande røysting var det tre kandidatar som biskopar og bispedømeråd har uttalt seg om. No skal dei tre verte intervjua av Kyrkjerådet sitt arbeidsutval.

Det er Kyrkjerådet som tilset ny biskop, ut i frå ei heilskapleg vurdering. Den rådgjevande røystinga, bispedømerådet si tilråding, biskopane sine tilrådingar og individuelle intervju med kandidatane dannar til saman grunnlaget for vedtaket til Kyrkjerådet.

Kyrkjerådet tilset ny biskop i Bjørgvin på sitt møte i Bergen, 9.–10. februar 2023.