Difor må Statens vegvesen stengja denne gang- og sykkelvegen på nettene i veke 36

Dette gjer me for at brøytemannskapane skal få betre plass til å snu køyretøya om vinteren.

Kjørnessvingen ligg like ved riksveg 5 Mannhellervegen sør for Sogndal.

Slik skjer arbeidet

Det me heilt konkret skal gjera, er å flytta muren ved bommen. Dette skjer natt til tysdag, onsdag, torsdag og fredag med arbeidstid klokka 19.00 - 06.00. Mjuke trafikantar kan passera med hjelpeperson mellom 19.00 og 22.00.

Gang- og sykkelvegen vil verta heilt stengd i arbeidsperiodane. Dette er ein veg som vert mykje nytta, mellom anna av skuleborn og syklistar.

– Me legg arbeidet til natta, den tida på døgnet då det er minst trafikk. Dette gjer me for å minimera ulempene for brukarane av vegen, seier byggeleiar Lars Busk Grinde i Statens vegvesen.

Nattarbeidet kan medføra noko støy, og me har forståing for ulempene dette kan medføra, legg han til.

– Trafikken på riksveg 5 vil ikkje bli påverka av arbeidet på gang- og sykkelvegen, understreker Busk Grinde til slutt.

Gir betre trafikktryggleik, året rundt

For Statens vegvesen er det avgjerande å ta eit heilskapleg samfunnsansvar, noko som mellom anna innebér å samhandla med andre etatar.

Busk Grinde understreker at kommunelegen i Sogndal har godkjent arbeida som skal gjerast så skånsamt som råd, med så lite støy som mogleg for å unngå sjenanse for naboar. 

– I tillegg er det viktig å minna om at breiare gang- og sykkelveg og vil koma alle brukarane av området til gode. Denne utvidinga, kombinert med betre tilhøve for vinterdrifta, vil også gje også betre trafikktryggleik for oss alle, både mjuke trafikantar og køyrande, året rundt.

Drift og vedlikehald handlar om alt det me i Statens vegvesen gjer kvar dag – heile året – for å utføra vårt samfunnsoppdrag med å halda riks- og europavegnettet ope, trygt og føreseieleg framkomeleg for trafikantene. God vinterdrift, og best mogleg tilhøve for denne, er ein viktig del av dette.