Berit Opheim og Tore Brunborg er ute med stjernespekket plate

Den fantastiske gjengen kjente og kjære musikarar, med Brunborg og Opheim i spissen, har teke utgangspunkt i ulike folketonar og slåttar frå mellom anna Voss, Sogn og Hardanger, og serverer desse i nye arrangement og med nykomponerte tema. 

Hør albumet her! 

«Det er ei stor glede å presentere denne musikken som er gamal, kortreist musikk som etter vårt syn framleis står seg og talar til folk i dag» skriv Berit Opheim i omslagsteksten. «Uttrykket i Hildo er ei blanding av musikkuttrykk frå alle dei fem musikarane. Dette er vår måte å ”ha vit pao eige tarv” - og arv.» 

 «Hildo» var namnet på kyrkjeklokka som ljoma over Vossevangen frå tårnet på Vangskyrkja i gamle dagar. Det finst fleire segn og folketonar til ære for klokka, som var kjend for sin uvanlege fine og sterke klang.  På albumet vert både balladar, bånsullar, stev, barnesongar, salmar og slåttar tolka og omforma i hendene på musikantar som går «Hildo» sjølv ein høg gong når det kjem til klang og styrke. 

 Utgangspunktet for denne innspelinga er at Helge Skansen, tidlegare dagleg leiar ved Riksscenen i Oslo kontakta den røynde jazzmusikaren, komponisten og saksofonisten Tore Brunborg om eit samarbeid med folkesongaren Berit Opheim, båe med røter på Voss. Tore og Berit ville gjerne ha med seg gitarist Stein Urheim, bassist Steinar Raknes og trommeslagar Kåre Opheim. Prosjektet hadde première på Vossa Jazz 2018, og vart bestilt av Riksscenen og festivalen. For konserten på Voss vart prosjektet nominert til Kritikerprisen for musikk i 2018.