NVE tilrår løyve til bygging av Tokagjelet kraftverk

NVE si tilråding gjeld omsøkt utbyggingsalternativ, med inntak i Longvotni 357 moh. og avlaup 55 moh. i Steinsdalselva. Kraftstasjonen er planlagd bygd i fjell i området Neteland. I dette området skal det også plasserast eit massedeponi. Kraftverket skal knytast til straumnettet via ein 132 kV kraftleidning fram til eksisterande kraftleidning mellom Samnanger og Øystese.   

I den samla vurderinga legg NVE vekt på at kraftverket vil produsere om lag 74 GWh kraft årleg, tilsvarande straumforbruket til 3700 husstandar. Ei utbygging vil soleis kunne gje eit positivt bidrag til den nasjonale satsinga på fornybar energi.

Kraftverket påreknast å gje inntekter til produksjonsselskap og grunneigarar og til Kvam herad i form av skattar og avgifter. Mulege konsekvensar er hovudsakeleg knytt til redusert vassføring på elvestrekninga nedstraums inntaket, og i nokon grad til fysiske inngrep i terrenget. Ålmenne interesser som i ulik grad vil bli påverka er naturmangfald, landskap og opplevingsverdiar, og kulturmiljø og kulturminne. I anleggsfasen vil verknadene vere avgrensa til midlertidig forureining, forstyrring på dyrelivet og ulemper for dei som bur i området. For å redusere dei negative verknadene er det foreslått avbøtande tiltak, t.d. slepp av minstevassføring heile året og omlaupsventil for å hindre at fisk strandar ved eit eventuelt utfall i kraftverket.

NVE meiner ei utbygging av Tokagjelet kraftverk på dei vilkår som er foreslått, vil vere akseptabel i høve til ålmenne og private interesser.

Olje- og energidepartementet vil stå for den vidare sakshandsaminga av Tokagjelet kraftverk.

Dokumenta er tilgjengeleg på NVEs nettstad

Kontaktpersonar:
Avdelingsdirektør Rune Flatby, tlf. 416 78 203.
Seksjonssjef Carsten Stig Jensen, tlf. 908 50 206.