NVE tilrår løyve til Tolga kraftverk

Opplandskraft DA står bak søknaden på Tolga kraftverk, som etter planen skal nytte fallet i Glomma gjennom Tolga sentrum. NVE tilrår løyve til alternativ 3B som inneber inntak ved Hummelvoll og utlaup oppstraums Eidsfossen, eit strekke på om lag 12 km.  NVE tilrår ikkje utbygging etter alternativa som inkluderer Eidsfossen.

NVE har i den samla vurderinga lagt vekt på at Tolga kraftverk vil gje eit betydeleg bidrag i produksjon av ny fornybar energi, der ein stor del er vinterkraft. Dei mest sentrale problemstillingane knytt til konsesjonsspørsmålet gjeld fisk og fisketurisme. I tillegg er Glomma eit viktig landskapselement igjennom Tolga sentrum og utbygginga påverkar ein av få attverande strykstrekningar i Glomma som ikkje er nytta til kraftproduksjon. 

NVE har gjort ei heilskapleg vurdering av planane, konsekvensutgreiingane og høyringsfråsegnene. På bakgrunn av dette rår NVE til fleire avbøtande tiltak, mellom anna for å oppretthalde fiskevandringar og produksjonsområde for fisk og botndyr på eit høgt nivå. Dette inneber mellom anna høgt fokus på effektive fiskepassasjar ved design av kraftverket, større minstevassføring om vinteren, slepp av lokkevann og krav om omlaupsventil. NVE rår vidare til eit fond på 5 millionar kroner til fisk og fisketurisme.

NVE tilrår samstundes at Eidsiva Nett AS og Røros Elektrisitetsverk AS får løyve til å oppgradere eksisterande leidning mellom Tynset og Røros frå 66 kV til 132 kV, samt til å bygge nye Tolga transformatorstasjon. NVE tilrår også løyve til ei 3,8 km lang 132 kV-leidning frå kraftverket og fram til ny transformatorstasjon. Oppgradering av eksisterande nett vil, saman med Tolga kraftverk, gi eit verdfullt bidrag til lokal kraftoppdekking og forsyningstryggleik i eit underskotsområde.

Etter ei samla vurdering meiner NVE at nytten av tiltaka er større enn ulempene, og at kraftproduksjonen veg opp mot ulempene tiltaket fører med seg. Olje- og energidepartementet vil stå for den vidare sakshandsaminga.

Les meir om tilråding til Tolga kraftverk med nettilknyting, på NVEs nettstad.

Kontaktpersonar:
Avdelingsdirektør Rune Flatby tlf 416 78203
Seksjonssjef Carsten Stig Jensen, tlf 908 50206