NVE gjev løyve til Trongstadlia kraftverk i Åfjord

I vedtaket legg NVE vekt på at ei utbygging av Trongstadlia kraftverk vil vere eit bidrag til auka fornybar kraftproduksjon med avgrensa effektar for miljø og brukarinteresser.

Kraftverket er planlagt i Amundalselva, med inntak ved kote 201 og kraftstasjon ved kote 155. Vassvegen vil med ein lengde på om lag 1200 meter mellom inntaket og kraftstasjon hovudsakleg gå i tunnel.

Tilknyting av kraftverket til eksisterande nett er endra og vil no gå som jordkabel langs fylkesveg 55. Med desse endringane meiner NVE det ikkje lengre er vesentlege negative konsekvensar for landskap, friluftsliv og reinbeiter knytt til nettilknytinga. 

NVE meiner tiltaket fører med seg akseptable og relativt små ulemper for naturmiljøet og andre allmenne interesser. NVE har fastsett ei minstevassføring på 390 l/s heile året.

Med dei fastsette vilkåra meiner NVE at fordelane ved ei utbygging er større enn skadane og ulempene for allmenne og private interesser, og gjev difor løyve til bygging av Trongstadlia kraftverk.

Kontaktpersonar:
Seksjonssjef Øystein Grundt, tlf. 22 95 93 89/901 98 216
Seniorrådgjevar Eirik Bjørkhaug, tlf. 22 95 93 66