Sykkylven får faresonekart for skred

– Kartlegginga gjev oss ny kunnskap om skredutfordringane i Sykkylven og vi ser at noko av busetnaden ligg innafor faregrensene for skred, fortel Brigt Samdal, regionsjef i NVE.

Det er utarbeidd faresonekart for område på begge sider av Sykkylvsfjorden og frå sørenden av Fitjavatnet og innover Velledalen. Karta er enkle i bruk og tek omsyn til skredtypane snøskred, sørpeskred, steinsprang, jordskred og flaumskred. Faresonene for kvar aktuell skredtype er også teikna saman inn i kartet, slik at kommunen berre treng å halda seg til éi skredsone. På den måten får kommunen raskt oversyn over kva område som er utsett for skred.

– Med faresonekarta som NVE no har fått utarbeidd, har kommunen eit godt grunnlag for arealforvaltning og byggesakshandsaming, for å vurdera sikringstiltak og for bruk i lokal skredberedskap, seier Samdal.

Grunnlaget for faresonekarta er studie av kart og flybilete, terrengmodellanalyse og feltsynfaringar. Karta er produsert i digital form, slik at kommunen og andre kan nytta resultata i eigne verkty saman med andre kartdata.

Rapporten med karta finn du på NVEs nettstad.

Kontaktpersonar i NVE:
Brigt Samdal, regionsjef, mobil: 907 48 238
Yngve Midtun, avdelingsingeniør/geolog, mobil: 409 18 678
Terje Systad, overingeniør/arealplan, mobil: 971 67 025