Faresonekart for skred i Ørsta kommune

– Kartlegginga gir oss ny kunnskap om skredutfordringane i Ørsta og vi ser at delar av busetnaden ligg innanfor faregrensene for skred, fortel Brigt Samdal, regionsjef i NVE.

Det er utarbeidd faresonekart for områda Årsetdalen, Rjåneset-Ørsta, Follestad og Bondalen. Karta er enkle i bruk og tek omsyn til skredtypane snøskred, sørpeskred, steinsprang, jordskred og flaumskred. Faresonene er teikna inn i kartet, slik at kommunen berre treng å halda seg til éi skredsone. På den måten får kommunen raskt oversyn over kva område som er utsett for skred.

– Med faresonekarta som NVE no har fått utarbeidd,har kommunen eit godt grunnlag for arealforvaltning og byggesakshandsaming, for å vurdera sikringstiltak og for bruk i lokal skredberedskap, seier Samdal.

Grunnlaget for faresonekarta er studie av kart og flybilete, terrengmodellanalyse og feltsynfaringar. Karta vert produsert i digital form, slik at kommunen og andre kan nytte resultata i eigne verkty saman med andre kartdata.

Rapport med karta finn du på NVEs nettstad.

Kontaktpersonar
Brigt Samdal, regionsjef, mobil: 907 48 238
Yngve Midtun, avdelingsingeniør, mobil: 409 18 678