Fem løyve og to avslag til småkraftverk i Flekkefjord og Kvinesdal

Dei fem kraftverka som har fått løyve vil til saman produsere om lag 40 GWh i eit medels år, noko som svarar til straumbruken til om lag 2000 husstandar. Dei to prosjekta som fikk avslag, ville samla gitt om lag 22 GWh/år.

Alle dei tre kraftverka i Kvinesdal kommune ynskte å nytte elva Litleåna mellom Galdalsvatnet og Liknes sentrum i Kvinesdal. Gjemlestad kraftverk får løyve, medan Vatland og Hamrebakken kraftverk får avslag.

Sentrale tema i NVE si vurdering av kraftverka i Kvinesdal kommune har vore friluftsliv, bading, fiske, naturmangfald og samla belastning på Litleåna. NVE har gjeve konsesjon til prosjektet som gjev minst konflikt med ålmenne interesser, og som samstundes vil gi eit godt bidrag til produksjon av fornybar energi.

Etter NVE si vurdering vil tilpassingar ikkje vere tilstrekkelege for å få løyve til å byggje kraftverka som fekk avslag.

Dei fire prosjekta i Flekkefjord; Furstølåna, Sandvand, Flikka og Selura, er spreidd på ulike stader i kommunen. Alle kraftverka får løyve.

Vatnet Selura i Flekkefjord er allereie regulert. NVE har gjeve løyve til ei regulering som vil betre tilhøva for mellom anna storaure, landbruk, friluftsliv og næringsinteresser.

Søknadane er handsama samla for å kunne gjere ei heilskapleg vurdering av verknadane av vasskraftverka. For å redusere dei negative verknadane for ålmenne interesser er det sett vilkår til kvart prosjekt som har fått løyve, NVE meiner at nytten av tiltaka er større enn skader og ulemper for private og allmenne interesser.

Søkjar                                  Kraftverk                         Effekt              Produksjon

                                                                                              (MW)             (GWh)

Vatland kraftverk (SUS)         Vatland kraftverk                   -                      -

Småkraft AS                           Gjemlestad kraftverk              6,89                 20,3

Kvinesdal kommune               Hamrebakkan kraftverk          -                      -

Clemens Kraft AS                   Furstølåna kraftverk               1,54                 4,35

Tinfos AS                               Sandvand kraftverk                1,48                 4,8

Clemens Kraft AS                   Flikka kraftverk                      1,75                 6,0

Tinfos AS                               Selura kraftverk                      1,1                   4,5

Les meir om kraftverka:

Vatland kraftverk

Gjemlestad kraftverk

Hamrebakkan kraftverk

Furstølåna kraftverk

Sandvand kraftverk

Flikka kraftverk

Selura kraftverk

Kontaktpersonar:
Sakshandsamar Tor Carlsen                       tlf: 22 95 93 93
Sakshandsamar Erlend Støle Hansen         tlf: 22 95 98 26
Sakshandsamar Birgitte M.W. Kjelsberg     tlf: 22 95 90 32
Seksjonssjef Øystein Grundt                       tlf: 22 95 93 89 / 901 98 216