Løyve til kraftleidning og transformatorstasjon for tilknyting av Østerbø kraftverk

Noregs vassdrags- og energidirektorat (NVE) gjev SFE Produksjon AS konsesjon for bygging og drift av ein ny, om lag 20,6 km lang 132 kV kraftleidning mellom Østerbø og Stordalen og til nye Østerbø transformatorstasjon i Høyanger kommune i Sogn og Fjordane.

NVE gjev konsesjon for bygging av kraftleidningen som luftleidning etter traséalternativ C mellom Østerbø og Leinene i Stordalen og som jordkabel etter traséalternativ A mellom Leinene og eksisterande koplingsanlegg ved Stordal kraftverk.

Bakgrunnen for konsesjonsvedtaket er behov for å knytte konsesjonsgjevne Østerbø kraftverk til eksisterande nett. Kraftverket er med reguleringsmagasin og installert effekt på 50 MW berekna å kunne gje ein produksjon på 168 GWh som årsmiddel, svarande til forbruket til om lag 8.400 bustader. I tillegg opnar leidningen og transformatorstasjonen for å knytte ytterligare 19 MW småkraft til nettet.

NVE meiner ulempene ved nettanlegga i hovudsak vil vera visuelle verknader. NVE meiner at anlegga vil bidra betydeleg til å skaffe fram ny fornybar produksjon, og at jamført med nytten er ulempene for andre interesser små med dei løysningane som NVE har gjeve konsesjon for.

Les meir om saka.

Kontaktperson:
Seniorrådgivar Arne Anders Sandnes tlf: 95 04 47 58