NVE tilrår løyve til kraftforsyning av Johan Sverdrup-feltet

NVE legg til grunn at Stortinget har bestemt at Johan Sverdrup-feltet og felta Gina Krog, Ivar Aasen og Edvard Grieg skal få kraftforsyning frå land seinast innan 2022. NVE meiner det er ledig kapasitet i dagens kraftnett til å forsyne felta med inntil 300 MW frå Kårstø. Etter NVE si vurdering vil verknadane av anlegga vere små for miljø, samfunn og private interesser, under føresetnad av at vilkår om å ta omsyn til natur- og miljø vert følgt opp under anleggsarbeidet.

NVE tilrår at det vert gjeve konsesjon til anlegg som er naudsynt i fase 1 av Johan Sverdrup-utbygginga, som mellom anna omfattar jordkabel frå Kårstø til Haugsneset i Tysvær kommune, ein omformarstasjon på Haugsneset og sjøkablar ut til Johan Sverdrup-feltet. Anlegga i fase 1 vil ha ein kapasitet på omlag 115 MW. NVE tilrår òg at det vert gjeve konsesjon til nokre anlegg for fase 2, då det gir reduserte kostnader og ulemper å byggje anlegga i ein operasjon.

Innstillinga vert sendt til Olje- og energidepartementet for vidare handsaming.

Les meir om saka:

Kraft frå land til Johan Sverdrup-feltet

Kontaktperson:

Avdelingsdirektør Rune Flatby, tlf. 416 78 203