Tilrår løyve til bygging av Leikanger kraftverk

I den samla vurderinga legg NVE vekt på at kraftverket vil produsere omlag 160 GWh kraft årleg, noko som svarar til straumbruken til omlag 8000 husstandar. Ei utbygging vil soleis kunne gje eit betydeleg bidrag til den nasjonale satsinga på fornybar energi.

NVE si tilråding legg til grunn utbygging etter alternativ C som inneber regulering av Store Trastadalsvatn og overføring av Henjaelvi til Grindselvi på 530 moh. Kraftstasjonen er planlagt bygd i fjell ved Suppam med avlaup til Sognefjorden. Kraftverket skal knytast til straumnettet via ein 132 kV kraftleidning til transformatorstasjon på Seljevollen i Grindsdalen.

Mulege konsekvensar er knytt til redusert vassføring på dei strekningane som skal regulerast, varierande vasstand i magasinet, og fysiske inngrep i terrenget. Ålmenne interesser som i ulik grad vil bli påverka er landskap, friluftsliv, kulturmiljø og kulturminner, og fisk og anna naturmangfald. Mange av høyringsinstansane er opptekne av at drikkevassforsyninga i kommunen, som nyttar Henjaelvi som kjelde, ikkje vert forringa. For å redusere dei negative verknadene er det foreslått avbøtande tiltak, som til dømes slepp av minstevassføring heile året, og restriksjonar på bruken av magasinet for å sikre tilstrekkeleg vassreserve til andre eksisterande vassuttak. Inntaket til det kommunale vassverket må flyttast oppstraums kraftverksinntaket.  

NVE meiner ei utbygging av Leikanger kraftverk etter alternativ C, på dei vilkår som er foreslått, vil vere akseptabel i høve til ålmenne og private interesser.

Olje- og energidepartementet vil stå for den vidare sakshandsaminga av Leikanger kraftverk.

Les meir om Leikanger kraftverk på nve.no.

Kontaktpersonar:
Avdelingsdirektør Rune Flatby, tlf. 22959088
Seksjonssjef Carsten Stig Jensen, tlf. 22959290