Løyve til Fjerdingelva kraftverk

I vedtaket har NVE lagt vekt på at ei utbygging av Fjerdingelva kraftverk vil vere eit bidrag til auka fornybar kraftproduksjon med avgrensa miljøeffektar.

Fjerdingelva kraftverk vil etter dei framlagte planane nytte ei fallhøgd på 89 meter i Fjerdingelva og Steinåa, med inntak på høvesvis kote 249 og 260, samt kraftstasjon på kote 160. Vatnet skal førast i røyr frå inntaka til kraftstasjonen, og vassrøyra skal ligge nedgrave på heile strekninga.

For å ta vare på naturverdiar, landskap og oppretthalde noko av den økologiske balansen knytt til elvane, er det sett krav om å sleppe ei minstevassføring på 240 l/s i Fjerdingelva og 60 l/s i Steinåa i sommarsesongen. Resten av året er det sett krav om 120 l/s for Fjerdingelva og 40 l/s for Steinåa. Det er sett krav om avbøtande tiltak for reindrift gjennom at anleggsperiode og ferdsel teke omsyn til reindrifta. Ein skånsam og god teknisk utføring er viktig for å redusere landskapsinngrepa.

NVE vurderer i sum at nytten av tiltaket er større enn skader og ulemper for private og allmenne interesser, og gjev difor løyve til bygging av Fjerdingelva kraftverk og overføring av Steinåa på nærare fastsette vilkår.

Les meir om Fjerdingelva kraftverk.

Kontaktpersonar:

Seksjonssjef Øystein Grundt, tlf. 22 95 93 89 / 901 98 216

Avdelingsingeniør Erlend Støle Hansen, tlf. 22 95 98 26