NVE tilrår konsesjon til Nedre Otta kraftverk

Nedre Otta kraftverk skal nytte fallet i Ottaelva frå eksisterande dam i Eidefossen og vil ha konsekvensar for ei strekke på omlag 10 km. Kraftverket skal knytast til nettet med ein  12 km lang 132 kV kraftleidning til den konsesjonsgjeve kraftleidningen Rosten-Vågåmo.

Dei negative verknadane er i hovudsak knyta til det samanhengande vassdragsmiljøet i Otta-/Lågensystemet, langtvandrande bestandar av harr og aure, og elvesportaktivitetar som rafting og padling.

NVE har gjort ei heilskapleg vurdering av planane, konsekvensutgreiingane og høyringsfråsegnene. NVE rår til eit minstevassføringsregime som skal sikre tilstrekkeleg vassføring sommar og vinter av omsyn til fisk og andre levande organismar i vatnet. Av omsyn til elvesportaktivitetar i Otta, tilrår NVE ekstra slepp av vatn to dagar i uka på sommaren. NVE rår vidare til at utløpet frå kraftverket vert flytta ovafor Grindhølen av omsyn til fisk og elvesportaktivitetar.

NVE tilrår at det gis løyve til å rive den eksisterande 66 kV leidningen mellom Vågåmo og Tolstadåsen, slik at ny 132 kV leidning kan nytta eksisterande trasé. Det inneber at det må installerast ein 66/132 kV transformator i Nedre Otta kraftverk og bygging av omlag 3,5 km ny 66 kV leidning frå kraftverket til Tolstadåsen. NVE meiner riving av 66 kV leidningen er viktig for å minske verknadene for landskap og lokalmiljø.   

Etter ei samla vurdering meiner NVE at nytten av tiltaket er større enn ulempene. Det er lagt vekt på at Nedre Otta kraftverk med avbøtande tiltak som foreslått, vil gi ein årleg produksjon på omlag 297 GWh. NVE meiner at kraftproduksjonen veg opp dei negative konsekvensane tiltaket vil medføre.

Olje- og energidepartementet  vil stå for den vidare sakshandsaminga.

Les meir om tilråding om Nedre Otta kraftverk og nettilknyting på NVE si nettstad.

Kontaktpersonar:
Avdelingsdirektør Rune Flatby tlf 416 78 203
Seksjonssjef Carsten Stig Jensen, tlf 908 50206