NVE tilrår konsesjon til Sauland kraftverk

NVE har i den samla vurderinga lagt særleg vekt på at Sauland kraftverk vil gje eit betydeleg bidrag i produksjon av ny fornybar energi der ein stor del er regulerbar kraft. Dette vil vere med å oppfylle politiske mål om auka satsing på fornybar kraftproduksjon i Noreg.

Utbygginga rører ved hovudelvane Skogsåa og Hjartdøla med inntak i Sønderlandsvatn og Hjartsjå, og felles kraftstasjon med utlaup i Heddøla nedstraums Omnesfossen. Det er og søkt om å ta inn avløpet frå seks sidebekkar inn til kraftstasjonen.

Dei negative verknadane er i hovudsak knytt til elvemusling i Hjartdøla, viktige naturtypar med fleire raudlista artar, endra landskapsbilete ved redusert vassføring med særleg vekt på Omnesfossen, samt negative konsekvensar for elvepadling i Skogsåa.

NVE har gjort ei heilskapleg vurdering av planane, resultata frå konsekvensutgreiingane og dei mottekne høyringsfråsegnene. På bakgrunn av dette tilrår NVE at bekkane Skorva, Vesleåa/Kjempa og Grovaråa blir tekne ut av prosjektet og at minstevassføringa i Hjartdøla vert auka betrakteleg. Dette vil etter NVEs syn ivareta førekomsten av elvemusling og halde ved lag viktige naturtypar i større grad. Det vil også sikre ei viss vassføring i Omnesfossen av omsyn til landskapet. Av omsyn til elvepadling i Skogsåa tilrår NVE ekstra slepp av vatn to dagar i året i samband med arrangement.

Etter ei samla vurdering meiner NVE at nytten av tiltaket er større enn dei medrekna ulempene. Bygging av Sauland kraftverk med avbøtande tiltak og endringar som foreslått vil redusere det omsøkte hovudalternativet med  rundt 35 GWh noko som gjev ein årleg produksjon på omlag 183 GWh. NVE meiner at kraftproduksjonen veg opp dei negative konsekvensane tiltaket vil medføre.

Olje- og energidepartementet  vil stå for den vidare sakshandsaminga.

Les meir om tilråding til Sauland kraftverk på NVEs nettstad.

Kontaktpersonar:
Avdelingsdirektør Rune Flatby tlf 416 78203
Seksjonssjef Carsten Stig Jensen, tlf 908 50206