Meir fornybar kraft i Vinje i Telemark

I vedtaket har NVE lagt vekt på at ei utbygging av Vesle Kjela kraftverk vil gje ein viss ny årleg fornybar og regulerbar energiproduksjon, og såleis gje ei betre utnytting av eit vassdrag som allereie er regulert.

Vesle Kjela vil bli det øvste kraftverket i greina Tokkevassdraget, og kraftverket vil nytte fallet frå det regulerte Kjelavatnet. Kraftstasjonen er planlagt bygd i fjell, nordaust for tappeluka ved Kjelavatnet, og vil få ein installert effekt på 5 MW. Med ei minstevassføring tilsvarande kravet i Kjelåi nedstraums, er årleg produksjon berekna til 25 GWh. Dette svarar til straumbruken til omlag 1250 husstandar.

NVE meiner at ulempene med ei utbygging hovudsakleg er eventuelle negative verknader ved redusert vassføring gjennom Vesle Kjelavatn og moglege forstyrringar ovanfor villreinbestanden i anleggsperioden. Ved fastsetting av minstevassføring og avgrensingar i anleggsperioden finn likevel NVE at det er ei akseptabel utbygging.

NVE vurderer såleis nytten av tiltaket som større enn ulempene for allmenne og private interesser og gjev difor løyve til bygging av Vesle Kjela kraftverk på nærare fastsette vilkår.

Les meir om Vesle Kjela kraftverk på NVEs nettstad.

 
Kontaktpersonar:
Seksjonssjef Carsten Stig Jensen, tlf 22 95 92 90
Førstekonsulent Heidi Kannick, tlf 22 95 91 79