Tilrår utbygging av Herand kraftverk i Hordaland

NVE legg vekt på at vasskraftverket vil gje eit monaleg tilskot til produksjon av fornybar energi.

Prosjektet er eit elvekraftverk med inntak i Storelvi nedanfor Fodnastølsvatnet, omkring 527 moh. Kraftstasjonsbygningen er planlagt plassert  like ved Storelvi på Trå og vil utnytte ei fallhøgde på knapt 440 m. Andre vesentlege terrenginngrep gjeld nedgraving av røyrgate på omlag 2,6 km og ein kortare anleggsveg frå skogsveg fram til inntaket.     

NVE meiner at tiltaket sine verknader for miljø og naturressursar er akseptable, og vektlegg i tilrådinga at utbygginga vil skåne Fodnstølsvatnet og Fodnastølsfossen mot inngrep og fråføring av vatn. Dette gjer at viktige landskapselement i det opne fjellområdet vil framstå med naturleg vassføringsvariasjon.   

Som avbøtande tiltak på utbyggingsstrekninga foreslår NVE mellom anna å sleppe tilsigsavhengig minstevassføring på 390 l/s og 220 l/s høvesvis om sommaren og vinteren. Minstevassføringa saman med avrenninga frå restfeltet, der Grimeelvi gjev eit vesentleg tilskot, vil medverke til å oppretthalde  naturmiljøet i Storelvi.

Sidan søknaden omfattar eit elvekraftverk som produserer over 40 GWh og har installert effekt på meir enn 10 MW, går saka til Olje- og energidepartementet, som vil stå for den vidare sakshandsaminga.

Les meir om tilrådinga til Herrand kraftverk på NVEs nettstad

Kontaktpersonar:
Avdelingsdirektør Rune Flatby tlf 416 78203
Seksjonssjef Carsten Stig Jensen, tlf 908 50206