300.000 kroner til 1000-meteren

– Tilskotet skal gå til utbetring og reparasjon av eit område skadd av ras og utgliding. Når vegen blir sett tilbake til opphaveleg stand vil den bli ein turistattraksjon og eit reisemål, fortel Simen Bjørgen i Kulturminnefondet.

Den gamle anleggsvegen frå 1910 er på Statens Vegvesen si liste over verneverdige vegar og er viktig for den gamle veghistoria i Årdal, skriv søkar, som er Årdal Utvikling. Vegen vart bygd av Norsk Hydro i samband med kraftutbygginga og sto ferdig i 1920. I 42 hårnålssvingar slyng den seg opp til 1000 meter over havet.

– At vegen blir sett i stand vil ha stor verd for bruken, både for lokalbefolkninga og turistar. Vegen har rast ut mykje, og det har ikkje vært anbefalt å bruke den. Men nå kjem vi i gang, og eg håpar den blir klar allereie til hausten, seier Trine Grøttebø i Årdal Utvikling.

I 1964 blei vegen omklassifisert til privat veg og har seinare blitt mykje brukt som turveg for syklistar og gåande. Men utglidning av vegbana har avgrensa bruken dei siste fem åra. I dag er det farlig å ta seg forbi rasstaden, og adkomsten er utfordrande. Årdal Utvikling ønsker å gjennomføre utbetringsarbeidet på vegen for å etablere en trygg løysning for gåande og syklande, slik at vegen kan nyttes som ein ressurs i reiselivsutviklinga.