Tilråding til OED for ny 420 kV kraftleidning Modalen – Mongstad

NVE meiner det er viktig å styrke forsyningstryggleiken til Bergensområdet og at kraftleidningen Modalen – Mongstad er den beste løysinga for å sikre dette. Leidningen vil også leggje til rette for tilknyting av ny fornybar kraftproduksjon. Tiltaket er rekna til å koste omlag 900 millionar kroner.

Kraftleidningen er omlag 62,5 kilometer lang og vil ha konsekvensar for kommunane Modalen, Masfjorden, Gulen, Lindås og Austrheim. Leidningen vil starte ved ny koplingsstasjon ved Steinsland kraftverk i Modalen kommune. NVE tilrår bygging av ny Haugsvær transformatorstasjon i Masfjorden kommune og ny 132 kV kraftleidning for å knyte Matre kraftverk til den nye transformatorstasjonen. NVE tilrår også utviding av Frøyset transformatorstasjon i Masfjorden kommune. Denne utvidinga gjer at dei to vindkraftverka Bråsviksåta og Dalsbotnfjellet i Gulen kommune kan knytast til nettet.

Store deler av leidningen går i område med god avstand frå busetnad. Leidningen vil vere mest synleg der den kryssar dalar med busetnad eller veg. På strekninga frå Matre til Frøyset vil 420 kV-leidningen erstatte eksisterande 132 kV-leidning, som vil bli riven. 420 kV-ledningen vil bli eit nytt, synleg inngrep i fjellområdet Stølsheimen, som vert nytta til friluftsliv. NVE har likevel lagt vekt på at traseen gjennom Stølsheimen unngår særleg verdfulle område for friluftsliv og kulturmiljø. Samla vurderer NVE at leidningen ikkje vil gje vesentlege verknader for naturmangfaldet.

Les meir om tilrådinga til ny 420 kV kraftleidning Modalen – Mongstad

Kontaktpersonar:
Vassdrags- og energidirektør Per Sanderud tlf. 22 95 90 20
Avdelingsdirektør Rune Flatby tlf. 22 95 90 88