Løyve til Tverrelva kraftverk

I vedtaket har NVE lagt vekt på at ei utbygging av Tverrelva kraftverk vil vere eit bidrag til ein fornybar energiproduksjon med avgrensa miljøeffektar.

Utbygginga vil nytte ei fallhøgd på omlag 304 meter og vil endre naturleg vassføring i Tverrelva på ei omlag 2,3 km lang strekning. Inntaket blir bygd i Nedre Tverrelvvatn, som skal regulerast med ein meter i vinterhalvåret. Av omsyn til friluftinteressa langs Turistforeninga si tursti, vil vasstanden vere på høgste nivå i sommarhalvåret.

Av omsyn til naturmiljø og brukarinteresser er det sett vilkår om at det blir sleppt ei minstevassføring i Tverrelva på 90 l/s om sommaren og 40 l/s om vinteren. Det er også sett vilkår om installasjon av ein omlaupsventil i kraftverket, av omsyn til anadrom fisk nedanfor kraftstasjonen. Vassvegen skal gå i tunnel frå vatnet til påhogget på kote 160. Resten av strekninga ned til kraftstasjonen blir røyrgata grave ned på vestsida av elva.

Reguleringa i Nedre Tverrelvvatn vil utjamne vassføringa nedstraums kraftverket i Tverrelva til ein viss grad, men NVE meiner det ikkje vil ha særleg stor verknad for laks og sjøaure. Det er opna for ei best mogleg tilpassing for landskap og miljø ved NVEs endelege godkjenning av detaljplanen for utbygginga. NVE vurderer at reguleringa og utbygginga saman med avbøtande tiltak er akseptable i høve til allmenne interesser.

Les meir om løyve til Tverrelva kraftverk på NVEs nettstad

Kontaktpersonar:
Seksjonssjef Øystein Grundt, tlf. 22 95 93 89 / 90 19 82 16
Overingeniør Birgitte Marie Wilvang tlf 22 95 90 32