Forslag til ny lov om data frå korttidsutleige på høyring

– Korttidsutleige skjer i dag i stor grad gjennom digitale plattformer som opererer på tvers av landegrensene. Då er det også behov for felles reglar for korleis opplysningar om slik aktivitet kan samlast inn og delast. Med dette lovforslaget følger vi opp eit felles europeisk regelverk på området, seier næringsminister Cecilie Myrseth.

Korttidsutleige gjennom digitale plattformer har blitt vanlegare i mange europeiske land. Samtidig som slik utleige kan gi nye moglegheiter for vertar, turistar og lokale verksemder, kan det også skapa utfordringar i område med høg turistaktivitet og press på bustadmarknaden.

EU vedtok derfor våren 2024 eit felles rammeverk for innsamling og deling av data knytte til korttidsutleige av overnattingsstader. Formålet er mellom anna å bidra til auka openheit og å legge til rette for berekraftig utvikling av reiselivet.

Lovforslaget frå departementet inneber ikkje i seg sjølv at det blir innført ei registreringsordning for korttidsutleige eller krav om deling av opplysningar frå digitale plattformer i Noreg. Forordninga fastset berre krav som skal gjelde dersom nasjonale myndigheiter vel å etablere slike ordningar.

Departementet inviterer ramma aktørar og andre interesserte til å komma med innspel til lovforslaget.

Høyringsfristen er 14. januar 2027. Her finn du høyringa.

Fakta om regjeringa sitt arbeid med reiseliv:

• Sommaren 2025 vedtok Stortinget besøksbidragslova, som gir kommunar med særleg stor belastning frå reiselivet eit nytt verktøy i møte med mange besøkande. Lova tredde i kraft 1. juli 2026.
• Frå 2027 kan dei første kommunane starte innkrevjing av overnattingsavgift.
• Forslag om cruiseavgift har vore på høyring, og forskrifta skal etter planen tre i kraft i 2027. Ambisjonen er at kommunane kan starte innkrevjing av cruiseavgift i første halvår 2027.
• Over nyttår vil regjeringa legge fram ein heilskapleg plan for reiselivet.