Sterkt resultat for Eviny gir høgare utbyte til vestlandskommunane

Hovudårsaka til auken i resultatet er at kraftprisen i Vest-Noreg var meir enn tre gonger så høg som i tredje kvartal i fjor.

– Vi leverer eit sterkt kvartal som kjem fellesskapet til gode, både som utbyte og som investeringar i samfunnskritisk infrastruktur. Samtidig er høge kraftprisar utfordrande for samfunnet. For å få prisane ned over tid må vi byggja meir fornybar kraft, nett og effekt, seier konsernsjef Ragnhild Janbu Fresvik.

70 prosent av det underliggande resultatet i Eviny går som utbyte til eigarane: 17 vestlandskommunar, to lokale kraftlag og Statkraft. Eviny varsla i september eit utbyteestimat for 2026 på mellom 1,75 og 2,15 milliardar kroner, mot 1,1 milliardar for 2025. Det høgare estimatet står ved lag også etter tredje kvartal.

Første vindkraftkonsesjon på ni år

I oktober fekk Eviny og Norsk Vind konsesjon til Moldalsknuten vindkraftverk i Sokndal, den første konsesjonen til eit nytt vindkraftverk på ni år.

– Moldalsknuten viser at vi kan byggja ut meir vindkraft i Noreg gjennom godt samarbeid, lokal forankring og grundige prosessar. Eg både håpar og trur at dette markerer ein ny start for vindkraft på land, der fleire kommunar seier ja og vi får realisert den nye krafta samfunnet treng, seier Fresvik.

Vindkraftproduksjon i tredje kvartal 2026 vart 471 GWh, ein auke på 229 GWh frå same kvartal i fjor. Auken er knytt til dei nye vindkraftverka i Bjerkreimsklyngen, som Eviny overtok 17. juni. Samla kraftproduksjon for Eviny i kvartalet vart 2,1 TWh, ein auke på 0,2 TWh. Vasskraftproduksjonen låg på om lag 1,6 TWh, same nivå som i fjor.

Kraftprisen i Vest-Noreg (prisområde NO5) var 122,1 øre/kWh i tredje kvartal, mot 33,8 øre/kWh i same kvartal i fjor.

Vasskraft for ei ny tid

Eviny har søkt konsesjon for to nye vasskraftverk i Samnanger. Dei er planlagt i eit vassdrag som allereie er regulert, og gjer det mogleg å produsera meir kraft når behovet er størst. Ein konsesjonssøknad for eit tilsvarande prosjekt i Vaksdal (Dalegarden kraftverk) er på veg inn til NVE.

– Kraftverka her vart bygd ut i ei anna tid, då det var nok å ta omsyn til at behovet skifta med årstidene. No skiftar det frå time til time, og vi må tilpassa kraftproduksjonen vår til nye behov i samfunnet. Krafta må vera der i dei timane behovet er størst, og då treng me meir effekt, altså evna til å produsera mykje på kort tid, forklarer Fresvik.

God forsyningstryggleik inn mot vinteren

Magasinfyllinga i NO5 auka markant gjennom tredje kvartal 2026. Frå siste heile veke i andre kvartal til siste heile veke i tredje kvartal auka fyllingsgraden frå 55,6 til 70,7 prosent, ein auke på 15,1 prosentpoeng. Oppfyllinga tok seg særleg opp mot slutten av kvartalet. Ved kvartalsslutt var nivået framleis lågare enn historisk median på 84,5 prosent.

– Forsyningstryggleiken er god. Vi har fått mykje påfyll av regn i magasina og har nok vatn til å kunna produsera gjennom vinteren. Eviny forvaltar vatnet ved å produsera når samfunnet har størst behov. Utfordringa er prisane, og situasjonen viser kvifor vi må byggja meir fornybar kraft og meir nett, seier Fresvik.

Les delårsrapporten for 3. kvartal 2026