Kinderegg ved Kvarmakløvet på E16

– Det er ein stor dag å kunna klippa snora for dette prosjektet som inneheld både  breiare og sikrare veg, betra skred-og flaumsikring og eit sideterreng som skal bidra betre i nullvisjonen for drepne og hardt skadde i trafikken, seier avdelingsdirektør Svenn Finden i Statens vegvesen om den tre kilometer lange strekninga nord i Voss herad. 

Kvarmakløvet ligg omtrent midt på strekninga, og har vore det mest krevjane partiet for trafikantane. 

Dette er prosjektet

Den tre kilometer lange vegetappen som no er opna ferdig utbetra, har tidlegare framstått som ein av dei dårlegaste mellom Bergen og Oslo. 

Vegen hadde i dette området tidlegare ikkje gul midtstripe, og den hadde smale og grunne grøfter som gav utfordringar  vinterstid med snø, høge brøytekantar og ved isnedfall. Dei nye grøftene er breiare og har betre dreneringstilhøve enn tidlegare, slik at utfordringane med is, snø  og sørpeskred skal verta mindre enn før. 

 – Trafikksikkerheita og framkomst på strekninga er no vorte betra gjennom at vi har gjort vegen og vegskuldrene breiare, etablert  forsterka vegoppmering (gul midtstripe og kvit kantstripe) og tilgjevande sideterreng, altså eit relativt flatt terreng som er utforma for å redusera konsekvensane ved utforkøyring. 

I tillegg er to avkøyrsler er lagde om for å betra sikta og hellingstilhøve. To kantstopp er vorte erstatta med busslomme og plattform.  

Vidare arbeid

Det blir etablert belysning frå Skromle bru til sørleg ende av Kvarmakløvet.  Statens vegvesen planlegg vidare for ytterlegare skredsikring i området.  

Prosjektet er sterkt etterlengta både lokalt og regionalt, og av både privatpersonar og transportnæringa. Statens vegvesen har jobba tett og godt saman med Voss herad for å få realisert bygginga. 

Ferdig på tid og budsjett

– Då dei naudsynte løyvingane var på plass, starta Statens vegvesen anleggsarbeida i desember 2024. Først var det sprenging, før vegen kunne breiddeutvidast for å oppfylla breiddekrava til kvit kantstripe og gul midstripe. Prosjektet er no ferdig til planlagd tid og innanfor styringsramma på 181 millionar. 

– Folk skal fram, bilar skal fram, varer skal fram, tenester skal fram. Betre framkomst på denne delen av E16 er avgjerande for Statens vegvesen, då E16 er ein av hovudvegane mellom Vestland og Austlandet. Vi tek vare på det vi har, held ved like der vi kan, og byggjer nytt der vi må, avsluttar avdelingsdirektør Svenn Finden i Statens vegvesen.

Takkar trafikantane for tolmodet  

Hovudentreprenør har vore Dokka Entreprenør. 

Av tryggleiksomsyn har det vore nødvendig med til dels omfattande trafikkregulering og stenging. Vegvesenet takkar trafikantane for tolmodet i anleggsperioden.