Odd Nordstoga vil seie deg noko «Før du går»

Det er ei forventing om at nasjonalskalden Odd Nordstoga har noko på hjartet kvar gong han skriv ein song. Med «Før du går» har han lete seg inspirere av dei små, venlege gestane me gjev kvarandre før me skil lag. Dei er små, men verdifulle. Du merkar når dei manglar.

Det er mogleg eg overdreiv litt, men det blei altså ei stor «powerballade» ut frå noko så lite som frustrasjon over tenåringsbarn som ikkjesa «god natt» før dei gjekk på rommet, eller «hadet» før dei stakk ut. Songen er ei smektande tale til avskils-gestens pris! 

Etter fleire travle år med mellom anna bokprosjekt, soloturné og samarbeid kjem Nordstoga no attende med eit nytt soloalbum. «Før du går» er siste smakebit, før albumet kjem 9. oktober.

På folkehøgskulen, for mange år sidan, var det alltid «ord for dagen». Det var ein fin start. Alle dagar burde jo ha ei lita overskrift. Noko ein kan ta med seg som nistepakke for sjel og sinn.

Det er igjen kjensla av ikkje å vera aleine det handlar om når Nordstoga har gjeve oss ein song. «Før du går» er også tittelkuttet på albumet. Dermed blir vel alle songane, når dei kjem ut, Odds små nistepakker for sjel og sinn som lyaren kan ha med seg ut i dagen og livet. 

Sigrid Aase frå bandet Hajk har sunge med meg før. Her bidreg ho igjen på framifrå vis med sin alltid nydelege og karakteristiske vokal.

Odd har skreve musikk og tekst og er ansvarleg for vokal, munnspel og gitarar. Produsent Kåre Chr. Vestrheim spelar keyboards og korar, og med seg har dei Bjørn Sæther (trommer og perkusjon), Tor Egil Kreken (bass og banjo) og Øyvind Blomstrøm (gitarar). Michael Scott Hartung har miksa og Morgan Nicolaysen mastra.

Singelen «Før du går» er ute fredag 25. september, og det nye Odd Nordstoga-albumet kjem 9. oktober  

Om Odd Nordstoga
Odd Nordstoga (1972) frå Vinje i Telemark er ein av sin generasjons aller største låtskrivarar. Songane hans har heilt sidan gjennombrotet med albumet «Luring» i 2004 krope inn i folks hjarte og blitt der. Han er songpoet og spelemann. Bokstavleg tala.

Han har vorte nominert til og tildelt mange prisar, mellom anna Edvard-prisen, Prøysenprisen, Gamleng-prisen og heile fem Spellemannprisarinkludert «Årets Spellemann». Og som alle gode spelemenn får Nordstoga oss både til å danse og til å gråte. Med vemodet i eine handa og musikkgleda i den andre lagar han songar som rører ved livet me lever, slik god musikk skal.

Nordstoga lever for møtet med publikum, anten han står åleine, med fullt band, i lag med gjester, eller lyft av strykarar. Han har vitja heile Noreg, og selt fleire hundre tusen billettar til konsertar og festivalar over heile landet. Han har skrive musikk til TV og film, bøker, og med musikken til adventskalender-serien «Jul i Svingen» og albumet “Jul” har han òg blitt ein viktig del av høgtida for mange.

Odd Nordstoga er blitt ein nasjonal leverandør av musikk med varig kraft. Når han dreg ut på vegen, har han både gamle skattar og nye songar med seg i skreppa. Du finn meir informasjon, inkludert oversikt over konsertar på heimesida www.oddnordstoga.no og Spotify kor han har over 175.000 månadlege lyttarar. Nordstoga er i tillegg kopla på sosiale media som Facebook, Instagram og TikTok med til saman over 130.000 følgjarar.