Skal få på plass døgnkvileplass mellom Lærdal og Voss

Konkurransen omfattar etablering, drift og vedlikehald av nye døgnkvileplassar for tungtransport langs den ti mil lange strekninga. Håbakken ligg like ved utløpet av Lærdalstunnelen på Lærdals-sida.

Frist for prekvalifisering er 21. oktober klokka 12.00. Frist for å levera tilbod er 27. november klokka 12.00.

Tilbodskonferansen finn stad 01. oktober klokka 10.00 på Teams. Utlysinga finn du her.

Det er aktuelt å inngå kontrakt med ein eller fleire private aktører/leverandørar. Statens vegvesen legg opp til ei ordning med betaling for årleg leige.

Dette er krava til døgnkvileplassen

– Det er behov for om lag 50 oppstillingsplassar på strekninga, seier byggjeleiar Henrik Knarvik i Statens vegvesen.

– Den enkelte døgnkvileplass skal ha minimum 10 og maksimum 30 oppstillingsplassar, og skal innehalda serviceanlegg med toalett/dusj. Det er behov for maksimalt éin døgnkvileplass per kommune på strekninga (Voss, Aurland og Lærdal). Det vil derfor vera ynskjeleg å tildela éin kontrakt for døgnkvileplass per kommune mellom Håbakken og Voss, potensielt tre stykk, legg han til. 

Køyreavstand frå E16 til døgnkvileplassen skal vera maksimalt tre kilometer.

Det vil bli etablert ladeinfrastruktur for tungbil.

Kvifor døgnkvileplass?

Målet med denne anskaffinga er å gje eit betre tilbod til tungtransportsjåførar som skal gjennomføra normal døgnkvile, redusert vekekvile (maks 45 timar) eller ta pausar (45 minutt) innanfor regelverket om køyre- og kviletid.

Køyre- og kviletidsreglane pålegg sjåførane som køyrer tunge bilar å ta pausar og kvila tilstrekkeleg lenge til å få ein normal søvnperiode.

Utkvilte sjåførar er trygge sjåførar. Trygge sjåførar er oppmerksame sjåførar som bidreg til betre trafikktryggleik for oss alle, i tråd med nullvisjonen for drepne og hardt skadde i trafikken.

Statens vegvesen ynskjer å vera ein ansvarleg vegeigar for alle trafikantar.

Å leggja til rette for at tungtransportsjåførar kan ta si lovpålagde døgnkvile, er ein del av dette samfunnsoppdraget.

Når skal døgnkvileplassen opna?

Statens vegvesen ønskjer å signera kontrakt på nyåret, og opna døgnkvileplassen innan hausten 2028.

Avtaleperioden gjeld i utgangspunktet 10 år, men opsjon for leigetakar å forlenga avtalen 1 + 1 år til totalt 12 år.

Statens vegvesen har døgnkvileplassar over heile landet. Oversikta finn du her.