Karbonfangst mogleg for langt fleire med nytt gigantmottak

– Med Langskip har Noreg etablert Europas første fullskala verdikjede for fangst, transport og lagring av CO₂. Denne erfaringa skal vi byggje vidare på. Det er positivt at vi no styrkjer verkemiddelapparatet, slik at fleire norske selskap kan ta i bruk CO₂-fangst. Støtte til mottaksterminalar vil gjere det enklare og meir kostnadseffektivt for mindre verksemder å kutte utsleppa sine, samtidig som vi tek vare på norsk konkurransekraft, seier energiminister Terje Aasland.

– Fram til no har berre nokre få selskap med store utslepp kunna lagre CO₂. Eg er derfor veldig glad for at vi no får på plass Noregs første mottaksterminal for CO₂ som ein òg kan nå via landtransport. Med dette nye anlegget vil både store og små bedrifter frå heile landet kunne fange og levere frå seg utsleppa sine. Dette er eit viktig steg for å nå klimamåla våre og sikre norsk konkurransekraft, seier klima- og miljøminister Sigrun Aasland.

Viktig brikke i større satsing

Hittil har lagring av CO₂ vore reservert for nokre få selskap med store utslepp, som fraktar fanga CO₂ med spesialbåtar til mottaket til Northern Lights i Øygarden utanfor Bergen. Derfrå blir CO₂-en pumpa vidare til eit enormt lager under havbotnen.

Den nye planlagde mottaksterminalen heiter CarbonLink, og skal byggjast rett ved sida av anlegget dei store aktørane bruker i dag. Forskjellen er at den nye terminalen vil kunne ta imot både små og store mengder CO₂, transportert både på veg og sjø. CCB Energy CarbonLink AS skal byggje det nye mottaket, og har fått innvilga 63,3 millionar kroner i støtte frå Enova. Støtta dekkjer inntil halvparten av investeringa. Den nye terminalen er planlagd å vere i drift frå slutten av 2028.

– Den nye mottaksterminalen for CO₂ i Øygarden er ei viktig brikke i Enovas satsing på karbonfangst og lagring. Vi jobbar no med å ferdigstille ei støtteordning for aktørar som ønskjer å fange utsleppa sine. Dei fleste som investerer i slike karbonfangstanlegg vil vere avhengige av å kunne levere utsleppa sine til den nye CO₂-terminalen, seier leiar for industri i Enova, Knut Granlund.

Kan utvidast ved behov

Mottaksterminalen er i første fase planlagd for å kunne handtere rundt 500 000 tonn CO₂ årleg. Voluma er venta å vere lågare dei første åra, samtidig som terminalen blir utforma med moglegheit for seinare utviding og auka kapasitet.

– Ei trinnvis utbygging av den nye mottaksterminalen for CO₂ kan redusere behovet for store investeringar før etterspurnaden er tilstrekkeleg dokumentert. Samtidig kan infrastrukturen skalerast opp når nye fangstanlegg blir klare. Vi er trygge på at dette senkar terskelen for verksemder som vil investere i karbonfangst, seier Ronny Haufe, administrerande direktør i CCB Energy CarbonLink.

Lokal og nasjonal gevinst

Øygarden-ordførar Tom Georg Indrevik ser gevinstar både lokalt og nasjonalt.

– Ved å samle og handtere mindre volum av fanga CO₂ kan den nye mottaksterminalen styrkje posisjonen til Øygarden som eit nasjonalt knutepunkt for CO₂-handtering, og skape ringverknader langt utanfor kommunen, seier ordførar Tom Georg Indrevik i Øygarden kommune.