Rett hausting gir plommer som held lenger

Den norske plommesesongen er kort, og i år er det venta om lag 1000 tonn norske plommer i marknaden. For nokre år sidan var det vanleg at store parti med plommer blei avvist fordi frukta vart overmoden eller ròten før ho nådde forbrukar. No har situasjonen betra seg.

– Det har vorte mykje, mykje betre dei siste åra. No har me nesten ingen avvisingar lengre, seier Ken Johannessen, innkjøpar av frukt og grønt hjå Coop Norge.

NIBIO-forskar Jorunn Børve har leia forskinga i samarbeid med Ullensvang fruktlager og Hardanger Fjordfrukt. Forskarane har undersøkt korleis mogningsgrad ved plukking påverkar kvaliteten under lagring og i butikk.

Resultata var tydelege: Sjølv om alle plommene såg fine ut då dei vart tatt ut frå kjølen, var det to til ti gonger så mykje ròte i dei godt mogne plommene etter to dagar i romtemperatur. I nokre parti vart halvparten av plommene øydelagt av ròtesoppar.

– Desse resultata var så tydelege at me kunne gje klåre råd til dyrkarar og fruktlager. Det aller viktigaste var å instruera plukkarane til å plukka plommene til rett tid, seier Børve.

Rett hausting er ein hårfin balansegang. Plommene må ikkje plukkast for tidleg, fordi dei då kan få lite smak og bli mindre søte. Samstundes er godt modne plommer meir utsette for ròte. Fruktlagera kan sortera dei mest mogne plommene for seg og selje dei raskt, medan høveleg mogne plommer kan halda seg på lager eit par veker.

Forskarane fann også at tiltak som reduserer soppsmitte i felt, verkar positivt på haldbarheita etter hausting.

– Som vanleg er god agronomi også bra for haldbarheita på lager og i butikk. Skal me sikra kvalitet heilt fram til forbrukar, må ein jobba for det gjennom heile vekstsesongen, avsluttar Børve.

Denne pressemeldingen er basert på en artikkel publisert på NIBIO.no. Medier kan fritt benytte både innholdet i pressemeldingen og tilhørende bilder mot kreditering av fotograf og henvisning til NIBIO.