Andreas Rotevatn & Tuva Syvertsen tek deg på ei sonisk berg- og-dal-bane med kronisk rytmefot - "Ad infinitum" ute no

Introen til låta sitérar starten på Miles Davis sin versjon av "Time after time" frå det elska/hata albumet "You're under arrest" frå 1985. Her høyrer ein jazztrompetister spele nokre av dei mest populære poplåtane på den tida i instrumental-versjon. Sånn sett er referansen eit godt bilete på prosjektet til Rotevatn - frå å vere ein jazzkomponist og - trombonist, har han no søkt mot eit meir poppa uttrykk, sjølv om det utvilsamt er mykje jazz i musikken og musiséringa til bandet. So får det vere opp til lyttaren om dei elskar eller hatar retningsvalet! 

Når bandet* var i studio, fekk medspelarane til Rotevatn ei kjensle av å vere med i eit slags kristen-band på eit tidspunkt.

"Det var noko med den anmassande stemninga i siste del av låta, som vart meir og meir vill jo fleire gongar vi spelte låta, som hadde noko halleluja-aktig over seg. På den gode måten! Den insisterte på å bli stadig meir og meir intens", hugsar Andreas. No er jo Rotevatn ateist på sin hals. "Musikkarven frå gospel-miljøet kan vere like so god om ein er truande eller ei".

Ad infinitum er latin og tyder 'i det uendelege'. Som rimar overraskande bra på siste ordet i Olav H. Hauge sitt mest kjende dikt. I hans dikt snakkar Hauge om å glede seg over det nye og vedunderiege ein kan mote på i framtida. Rotevatn spinner vidare på det i sin tekst, og påpeikar korleis det jaget mot stadig nye røynsler og sjølvrealiséring, og kan verte ei uendeleg tørste ein ikkje kan sløkkje.

For å finne ein vokalist til å kunne bære teksten i låta, spurde Rotevatn Tuva Syvertsen. "Med si eiga evne til å vere intim og rå på same tid, kler ho musikken perfekt," meiner Andreas. "Og so er det ikkje alle som kan framføre ein sopass nynorsk tekst på ein truverdig måte, når ein er austlending!" 

Albumet Mellom saltvatn og sola kjem ut 4.september på Grappa/Sounds Like Gold. 

*Andreas Rotevatn - trombone, tangentar & vokal 
Sander Nordahl - gitar 
Nikolai Hangsle - bass
Elias Tafjord - trommer