Svakare juni, men vekst gjennom første halvår

Tala for juni viser noko færre reisande enn i same månad i 2025. Nedgangen er størst innanriks, der talet på passasjerar gjekk tilbake med 2,7 prosent. Utanrikstrafikken heldt seg meir stabil, med ein nedgang på 0,6 prosent frå juni i fjor.

Flyrørsler

Flyaktiviteten held fram med å vere høg. Talet på kommersielle flyrørsler auka med 0,9 prosent i juni, medan samla flyrørsler auka med 0,4 prosent frå same månad året før.

Juni svakare enn fjoråret, men samla sett positiv utvikling så langt i 2026

Så langt i 2026 har utviklinga vore positiv. Frå januar til og med juni har Avinor registrert 25,9 millionar passasjerar, opp 2,1 prosent samanlikna med same periode i fjor. Veksten er særleg driven av utanrikstrafikken, som har auka med 3,6 prosent hittil i år.

Fleire av dei store lufthamnene hadde god utvikling i juni. Bergen lufthamn, Flesland hadde ein vekst på 5,2 prosent, medan Harstad/Narvik lufthamn, Evenes auka med 10,7 prosent samanlikna med juni i fjor.

Samstundes hadde fleire av dei største lufthamnene ein nedgang, mellom anna Oslo lufthamn (-3,7 prosent), Stavanger lufthamn, Sola (-4,4 prosent) og Trondheim lufthamn, Værnes (-4,2 prosent).

Sterk vekst på Bergen lufthamn gir behov for meir kapasitet

I juni reiste nær 690.000 passasjerar via Bergen lufthamn, Flesland. Så langt i år har over 3,3 millionar passasjerar reist til eller frå Flesland, og det har vore fleire reisande kvar månad så langt i år. Så langt i år er det sju prosent fleire reisande enn i første halvår 2025.

– Vi opplever framleis stor interesse for Vestlandet som reisemål, både blant norske og internasjonale reisande. Det gjer at fleire flyselskap satsar på Bergen og regionen vår, noko som bidreg til vekst i både trafikk og rutetilbod, seier Helge Eidsnes, lufthamnsjef ved Bergen lufthamn, Flesland.

-Den sterke veksten, særleg innan utanlandstrafikken, gjer at Avinor no planlegg fleire utbyggings- og kapasitetsprosjekt på Flesland. Målet er å tilpasse lufthamna til venta trafikkvekst og sikre gode reiseopplevingar for dei reisande i åra som kjem, fortel Eidsnes.

Dronetrafikk på same nivå som i fjor

Første halvår har det vore om lag 15.000 registrerte droneflygingar. Dette er stabilt og på same nivå som i fjor. – Skal du fly drone i sommar oppmodar vi om å setje deg godt inn i reglane for droneflyging, og hugs på droneforbodet kring alle lufthamner, seier Mats Gjertsen, leiar for Avinor sitt droneprogram.

Fakta juni

• Totalt tal passasjerar i juni 2026: 4 997 475
• Endring frå juni 2025: -1,8 %
• Innanrikspassasjerar: 2 716 468 (-2,7 %)
• Utanrikspassasjerar: 2 234 529 (-0,6 %)
• Offshorepassasjerar: 46 478 (+0,1 %)
• Totalt tal passasjerar januar–juni: 25 millionar
• Endring hittil i år: +2,1 %
• Utanrikstrafikk hittil i år: +3,6 %