Hugo Hermansen er ny direktør for Statens jernbanetilsyn

– Hugo Hermansen er ein erfaren leiar med bakgrunn frå både offentleg og privat sektor. Denne kompetansen gir han eit godt utgangspunkt for å leie Statens jernbanetilsyn, seier samferdselsminister Jon-Ivar Nygård.

Hugo Hermansen (54 år) er utdanna ved Luftkrigsskolen og har og gjennomført studium ved Handelshøyskolen BI og Høgskolen i Molde. I 2011 fullførde han ein MBA ved Naval Postgraduate School i USA.

Hermansen har lang erfaring frå ulike stillingar i Forsvaret. I 2014 byrja han som logistikksjef i Aerospace Industrial Maintenance Norway, og i 2019 blei han direktør for Operations i Kongsberg Aviation Maintenance Services. Det siste året har han vore direktør for Special Projects i same selskap.

Hermansen tar over stillinga etter Erik Ø. Reiersøl-Johnsen, som går av med pensjon frå 1. juli. Hermansen vil tiltre etter nærare avtale.

Om Statens jernbanetilsyn
Statens jernbanetilsyn (SJT) skal ta hand om tryggleiken på jernbane, trikk, t-bane, taubaner og tivoli, og dessutan overvake marknadene for jernbanetransport.

For fleire opplysningar – sjå:

• Nettsida til Statens jernbanetilsyn