Kystverkets rapport Status 2026 gir betre grunnlag for strategiske val langs kysten

No er Status 2026 her – den nyaste utgåva i Kystverket si årlege samling av fagartiklar som tek for seg sentrale tema for utviklinga i sjøtransporten. I årets utgåve blir det sett søkelys på fem område:

• nasjonal sikkerheit og samfunnsberedskap
• effektiv sjøtransport for næringslivet
• ein grønare og meir konkurransedyktig maritim sektor
• tryggare sjøveg – færre ulykker og raskare respons
• kompetanse og teknologi som drivkraft for gjennomføring

– Kystverket har betydelege operative kapasitetar, men skal også vere ein kunnskapsleverandør. Vi ønskjer at artikkelsamlinga skal gi eit oppdatert utplukk av utviklinga langs kysten – og vise kva som skal til for å sikre ein trygg, effektiv og føreseieleg sjøtransport også i framtida. Med eit tydeleg og felles kunnskapsgrunnlag blir det enklare å prioritere riktig, og slik legge til rette for både trygg ferdsel og verdiskaping langs kysten, seier kystdirektør Einar Vik Arset.

Endringar gir nye krav

Aktiviteten langs norskekysten er høg, og sjøtransporten speler ei viktig rolle for både næringsliv og lokalsamfunn. Samtidig skjer det store endringar i sjøtransporten og aktiviteten langs kysten, med nye krav til tryggleik, klima og teknologi. Status 2026 løftar fram dei viktigaste utviklingstrekka – både det som utviklar seg i positiv retning, og det som krev meir merksemd framover.

– Langs kysten er det stor merksemd om grøn omstilling, ny teknologi og konkurransekraft i den maritime sektoren. Rapporten synleggjer både moglegheiter og utfordringar, og gir eit viktig grunnlag for vidare prioriteringar. Dette er kunnskap som er relevant for alle som jobbar med utvikling langs kysten – både i næring og forvaltning, fortel leiar for utgreiing og analyse i Kystverket, Tore Relling.

Kunnskap som kan brukast

Eit hovudmål med rapporten er å gjere kunnskapen lettare å finne og ta i bruk – enten ein jobbar med planlegging, vurderingar eller avgjerder.

– Status 2026 er i praksis eit arbeidsverktøy. Vi meiner vi har samla kunnskap på ein måte som gjer den enklare å bruke i kvardagen. Rapporten er utvikla for å vere relevant over tid, og skal bidra til meir kunnskapsbaserte val langs kysten, fastslår kystdirektør Arset.

Vil du få eit betre overblikk over utviklinga – og kva som påverkar sjøtransporten framover? Les heile Status 2026 på https://www.kystverket.no/sjotransport-og-havn/status/status-2026/