Etablerer døgnkvileplass på E39 mellom Knarvik og Oppedal

Konkurransen omfattar etablering, drift og vedlikehald av ny døgnkvileplass for tungtransport langs den åtte mil lange strekninga sør for Sognefjorden.

Konkurransen omfattar etablering, drift og vedlikehald av ny døgnkvileplass for tungtransport langs den åtte mil lange strekninga sør for Sognefjorden.

Frist for prekvalifisering er 17. august klokka 12.00. Frist for å levera tilbod er 15. september klokka 12.00.

Tilbodskonferansen finn stad 26. juni klokka 10.00 på Teams. Her finn du lenke til utlysinga.

Det er aktuelt å inngå kontrakt med ein privat aktør/leverandør. Statens vegvesen legg opp til ei ordning med betaling for årleg leige.

Dette er krava til døgnkvileplassen

– Det er behov for mellom 15 og 20 oppstillingsplassar på strekninga. Vi krev at døgnkvileplassen må ha serviceanlegg med toalett og dusj, seier byggeleiar Henrik Knarvik i Statens vegvesen.

Køyreavstand frå E39 til døgnkvileplassen skal vera maksimalt tre kilometer.

Det vil bli etablert ladeinfrastruktur for tungbil.

Kvifor døgnkvileplass?

Målet med denne anskaffinga er å gje eit betre tilbod til tungtransportsjåførar som skal gjennomføra normal døgnkvile, redusert vekekvile (maks 45 timar) eller ta pausar (45 minutt) innanfor regelverket om køyre- og kviletid.

Køyre- og kviletidsreglane pålegg sjåførane som køyrer tunge bilar å ta pausar og kvila tilstrekkeleg lenge til å få ein normal søvnperiode.

Utkvilte sjåførar er trygge sjåførar. Trygge sjåførar er oppmerksame sjåførar som bidreg til betre trafikktryggleik for oss alle, i tråd med nullvisjonen for drepne og hardt skadde i trafikken.

Statens vegvesen ynskjer å vera ein ansvarleg vegeigar for alle trafikantar.

Å leggja til rette for at tungtransportsjåførar kan ta si lovpålagde døgnkvile, er ein del av dette samfunnsoppdraget.

Når skal døgnkvileplassen opna?

Statens vegvesen ønskjer å signera kontrakt høsten 2026, og opna døgnkvileplassen innan våren 2028.

Avtaleperioden gjeld i utgangspunktet 10 år, men opsjon for leigetakar å forlenga avtalen 1 + 1 år til totalt 12 år.

Statens vegvesen har døgnkvileplassar over heile landet. Oversikta finn du her.