Rekordinteresse for elektriske lastebilar

– Regjeringa har eit tydeleg mål om å nå Noregs klimaforpliktingar, og elektrifisering av lastebilar er heilt avgjerande for å få til dette. Difor er det svært positivt å sjå at stadig fleire søkjer om støtte til elektriske lastebilar. Vi har framleis ein veg å gå for å nå målet om at alle nye lastebilar skal vere utsleppsfrie innan 2030, men auka interesse og støtte frå Enova viser at vi er på god veg med å omstille ein sektor som står for ein stor del av norske utslepp, seier klima- og miljøminister Andreas Bjelland Eriksen.

– Etter rekordmange tildelingar av støtte frå Enova til elektriske lastebilar i mai, viser junitala at interessa for elektriske lastebilar held fram med å auke kraftig, seier ansvarleg for Enova si satsing på elektriske nyttekøyretøy, Carl-Erik Kullmann.

Ny rekord både i mai og juni

Førre rekord kom i mai, då Enova tildelte støtte til 178 elektriske lastebilar og bussar. Allereie i juni vart rekorden slått, med 381 millionar kroner i støtte til 318 elektriske lastebilar og bussar. Det er no 1410 tunge elektriske lastebilar på norske vegar. Bussar er då ikkje medrekna. Så langt i år har Enova gitt tilsagn om støtte til 873 tunge nullutsleppskøyretøy.

– Den store auken i interessa for elektriske lastebilar og bussar tyder på at stadig fleire i transportnæringa ser at rekkjevidd, pris og ladeinfrastruktur har vorte vesentleg betre, og utgjer eit godt alternativ til usikre dieselprisar, seier Carl-Erik Kullmann.

Noreg bak skjema, og tungtransport ein nøkkel

Vegtrafikken står for nesten ein femtedel av Noregs totale klimagassutslepp. Utslepp frå tunge køyretøy utgjer rundt 30 prosent av dette. Difor er det heilt sentralt å få lastebilar og andre tunge køyretøy over på løysingar utan utslepp. Ein ny rapport Enova lanserer om kort tid, viser at det truleg blir vanskeleg for Noreg å oppnå målet om at alle nye tunge køyretøy skal ha nullutslepp eller bruke biogass innan 2030.

– Med tanke på at Noreg ligg etter skjema med å omstille tungtransporten til nullutslepp, er den sterkt aukande interessa for elektriske lastebilar vi ser no svært gledeleg og heilt nødvendig, seier Kullmann.

Viktig å hjelpe dei som går føre

Det tek normalt mellom eit halvt og to år frå Enova gir tilsagn om støtte til eit køyretøy kjem på vegen. Difor vil effekten av dei auka støttetildelingane no først vise seg lenger fram i tid. Samstundes peikar registreringstala allereie i riktig retning. I 2025 var 10,2 prosent av nyregistrerte tunge lastebilar elektriske. Hittil i 2026 har andelen auka til 14,3 prosent.

– Enova si støtte skal bidra til at nullutsleppskøyretøy blir eit reelt alternativ på fleire bruksområde. No ser vi ein positiv trend der det ikkje berre er dei største aktørane, men også små og mellomstore transportbedrifter som kjøper elektriske tungbilar, seier Kullmann.