Fleire enn nokon gong bruker biblioteka i Noreg

Bruken av norske folkebibliotek held fram med å vekse. Besøket er no på det høgaste nivået som er registrert, og målt per innbyggjar må vi tilbake til toppåra tidleg på 2000-talet for å finne tilsvarande nivå.

Aldri før er det blitt lånt ut fleire bøker for barn og unge frå folkebiblioteka. Samtidig nådde det totale bokutlånet 14,1 millionar. Dette er det høgaste nivået sidan omlegginga av statistikken i 2008.

– Biblioteka har over mange år arbeidd målretta med lesefremjing, formidling og aktivitetar for ulike målgrupper. Det er gledeleg å sjå at dette arbeidet gir resultat, og at besøk, utlån og deltaking på arrangement held fram med å vekse, seier Grete Stuevold Madsbakken, avdelingsdirektør for bibliotektenester ved Nasjonalbiblioteket.

Nøkkeltal frå 2025

• 27,9 millionar besøk i folkebiblioteka (+3,6 prosent frå 2024)
• 14,1 millionar bokutlån (+5 prosent)
• 8,3 millionar utlån av bøker for barn og unge (+7,2 prosent)
• 1,93 millionar deltakarar på arrangement i bibliotek (+2,7 prosent)

Rekordutlån og leselyst blant barn og unge

Særleg utlånet av bøker for barn og unge held fram med å stige. I 2025 vart det lånt ut 8,3 millionar bøker i denne kategorien, ein auke på 7,2 prosent frå året før. I snitt vart det lånt ut 9,25 bøker per barn i 2025 – det høgaste nivået på 30 år.

Biblioteka speler ei sentral rolle i arbeidet med å skape leselyst. I løpet av året deltok om lag 567 000 barn og unge på nær 22 000 arrangement for barnehagar og skular. Av desse var 130 000 barnehagebarn, og dei deltok på over 6 300 arrangement.

– Det er gledeleg å registrere at biblioteka når ut til så mange barn. Dette er eit prioritert satsingsområde både i leselyststrategien og i bibliotekutviklinga, seier Grete Stuevold Madsbakken.

Møteplassar for stadig fleire

Biblioteka er også viktige arenaer for opplevingar, læring og fellesskap. I 2025 deltok nær 1,93 millionar menneske på arrangement i bibliotek over heile landet. Til saman vart det gjennomført om lag 76 500 arrangement, frå lesestunder og forfattarmøte til debattar, språkkafear og kulturarrangement.

Utviklinga peikar mot at folkebiblioteka held fram med å ha ein sentral plass i kvardagen til folk i Noreg – som kunnskapskjelde, kulturarena og møteplass.

Korleis ligg biblioteket ditt an?

Sjekk tala frå din kommune eller region i Folkebibliotekstatistikken for 2025 

Kva er dei mest lånte bøkene i biblioteka?

Sjekk kva for bøker som er mest lånte denne veka, i den nye statistikkløysinga på Bokbasen.no