NVE gjev løyve til å byggje transformatorstasjonar i Vik kommune

Statnett sin transformatorstasjon vil auke overføringskapasiteten og styrkje forsyningstryggleiken inn til Bergensområdet, seier seksjonssjef Ingrid Myrtveit i NVE.  

Sygnir og Statkraft sine tiltak vil auke kapasiteten i det lokale kraftnettet og NVE meiner dei er nødvendige for å unngå at regionalnettet og dei tre kraftverka mistar tilknytinga til det overliggjande nettet i området. 

Vegar og masselager  

I samband med utbygginga får Statnett løyve til å etablere fem masselager til deponering av overskotsmasser for bygginga av stasjonane. Dei får òg løyve til å utbetre delar av fylkesveg 5601 og ein privat veg for transport av nye transformatorar til stasjonane.  

Statnett og Sygnir får i tillegg løyve til oreigning for naudsynte grunn og rettar til å byggje, eige og drive anlegga.  

NVE stiller krav for å redusere negative verknader 

For å redusere negative verknader for miljø og samfunn stiller NVE ei rekke krav til korleis utbygginga skal gjennomførast. Statnett og Sygnir må mellom anna utarbeide ein detaljplan der dei må beskrive korleis anleggsarbeidet skal gjennomførast for å redusere negative verknader for omgjevnadene.  

– Det må i detaljplanen beskrivast korleis anleggsarbeidet skal tilpassast andre brukare av vegane, òg korleis ein mogleg mellombels veg over Klyv kan etablerast. Før anleggsstart må Sygnir og Statnett i tillegg kartleggje om det er hekking av vipe og storspove ved dei nye stasjonane, seier Myrtveit. 

Detaljplanen må utarbeidast i kontakt med Vik kommune, grunneigarar og andre rettshavarar og godkjennast av NVE før anleggsarbeida kan starte. 

NVE har ikkje ferdigbehandla kraftleidningane  

Statnett og Sygnir har òg søkt om konsesjon for fleire kraftleidningar i Vik kommune. NVE fekk ei rekke innspel i høyringa, og fleire omhandla val av trasear for kraftleidningane som gav behov for nye utgreiingar. NVE vurderte det som mest formålstenleg å behandle tiltaka vi no gir løyve til først, i påvente av utgreiingane. NVE tek derfor ikkje no stilling til val av trasear for kraftleidningane Statnett og Sygnir søkjer om. NVE sin sakshandsaming av kraftleidningane vil fortsetje når vi har motteke endelege utgreiingar.