Ber om droneforbod over 27 stavkyrkjer

Noregs 28 stavkyrkjer er blant dei bygningane i landet med høgast kulturhistorisk verdi. Dei eldste har stått i nærare 900 år, og er dermed blant dei eldste bevarte trebygningane i verda. 

Søknaden om droneforbodet går til Luftfartstilsynet. 27 av 28 stavkyrkjer stiller seg bak søknaden: 

– Stavkyrkjene er i aukande grad turistmagnetar, seier Marianne L. Nielsen, direktør for kulturminneavdelinga hos Riksantikvaren. 

– Med aukande besøkstal, ser stavkyrkjeeigarane at stadig fleire flyg drone rundt kyrkjene. Det har også vore uhell ved stavkyrkjer som følgje av droneflyging, men førebels har ikkje dette fått alvorlege konsekvensar. 

Dei best besøkte kyrkjene er store turistattraksjonar, og kan ha opp mot 60.000 betalande besøk i løpet av ein sesong. I tillegg besøkjer mange kyrkjene utanfor opningstida. 

Høg risiko for uhell 

Konsekvensene av uhell med dronar i samband med stavkyrkjene kan vere alvorlege. Kyrkjene har mange sårbare bygningsdelar som spir, glas, utskjeringar og tekniske anlegg som kan bli øydelagde ved ein kollisjon. Lithiumbatteriene i dronar kan ta fyr dersom dei får skadar. 

– Om ein drone styrtar og hamnar på eit tak eller inne i eit klokketårn utgjer det ein stor brannfare, understrekar Nielsen. 

– Dette vil vi unngå utan omsyn til kostnaden. 

Søknaden gjeld luftromrestriksjonar heile året. I samarbeid med stavkyrkjeeigarane, har Riksantikvaren avgrensa radiusen til det reint nødvendige for å oppnå ønsket effekt. For dei fleste kyrkjene er dette minimumet 100m radius frå stavkyrkja, men enkelte kyrkjer ser behov for ei større forbodssone. 

– I søknaden legg vi opp til at kyrkjeeigar kan innvilge unntak, seier Nielsen. 

– Dette kan gjelde vedlikehaldsarbeid eller søknader frå profesjonelle fotografar. I tillegg treng ikkje grunneigarane rundt kyrkjene å forhalde seg til restriksjonane innanfor eigen eigedom. 

Droneflyginga påverkar også opplevinga av stavkyrkjene negativt for dei besøkjande. Ein del stavkyrkjer har også kyrkjegard, og det betyr også at dronar forstyrrar gravfreden.

Desse stavkyrkjene vil ha droneforbud: 

• Borgund stavkyrkje: Radius 100m.  
• Eidsborg stavkyrkje: Radius 100m.  
• Flesberg stavkyrkje: Radius 100m.  
• Garmo stavkyrkje: Radius 100m.  
• Gol stavkyrkje på Norsk Folkemuseum: Radius 250m.  
• Grip stavkyrkje: Radius 100m.  
• Haltdalen stavkyrkje: Radius 100m.  
• Hedalen stavkyrkje: Radius 100m.  
• Heddal stavkyrkje: Radius 200m for å dekke heile kyrkjegarden.  
• Hegge stavkyrkje: Radius 100m.  
• Hopperstad stavkyrkje: Radius 100m.  
• Høre stavkyrkje: Radius 100m.  
• Høyjord stavkyrkje: Radius 100m.  
• Kaupanger stavkyrkje: Radius 140m for å dekke heile kyrkjegarden.  
• Kvernes stavkyrkje: Radius 100m.  
• Lom stavkyrkje: Radius 100m.  
• Lomen stavkyrkje: Radius 100m.  
• Nore stavkyrkje: Radius 100m.  
• Reinli stavkyrkje: Radius 100m.  
• Ringebu stavkyrkje: Radius 110m grunna stor kyrkjegarden.  
• Rollag stavkyrkje: Radius 100m.  
• Rødven stavkyrkje: Radius 100m.  
• Røldal stavkyrkje: Radius 100m.  
• Torpo stavkyrkje: Radius 100m.  
• Urnes stavkyrkje: Radius 100.  
• Uvdal stavkyrkje: Radius 130m for å dekke bygdetunet på nordsida.  
• Øye stavkyrkje: Radius 100m.  
  
  

Undredal stavkyrkje er den eneste kyrkja som ikkje er omfatta av søknaden. Årsaken til dette er at dei ikkje har det same presset frå turistenes droneflyging.